புத்துயிர்ப்பு - Resurrection

வேசிக்கும் வேண்டாதவன்...

2011-07-11T21:06:00.001-07:00

மக்கள் வணங்கும்
'சாமியார்' அவன்..
மாக்கள் அவர்களிற்கு
சாமி யாரென காட்டிட..

பரம்பொருள் அவனது
மகிமை பாடிட
பேரின்பப் பேருரை
புனைந்திட விரைந்தான்

எண்குணங் கொண்டு

மூவுலகம் கொள்ளும்
பரிணாமம் கடந்தவன்
உண்மை பாடிட

மும்மலங்களால் கட்டுண்டு
மானிட பாவம்
தனை நீக்கும் வழியொன்று
காட்டிவிட

பக்கங்கள் நிறைத்துச்சென்றான்
பலவரிகள் கிறுக்கிச் சென்றான்
பாவங்கள் கழுவிச் செல்லும்
பக்தி மார்க்கமொன்றை

உரை எழுதி முடிந்தவுடன்
மானிடப் பதர்தனை
உய்திட சொல்லிடுவேனெ்றான்
இதனை...

இவையனைத்தும் சொல்லிவிடும்
அவன்....
வேசிக்கும் வேண்டாதவன்....

-மோனி..

வவுனியாவில் நடை பெறவுள்ள Carnivelஐ புறக்கணிப்போம்....

2011-07-01T18:36:00.000-07:00

இந்தப் பதிவு ஒரு வவுனியாவை(இலங்கை) சேர்ந்த நண்பர்களுக்கொரு கோரிக்கை...

வவுனியாவில் வழமைபோல இந்த மாதமும் வருகிற கிழமை Carnivel களியாட்டங்கள் நடைபெறவுள்ளன. அதற்கான அடுக்குப்படிகளும் தற்போது ஆரம்பித்துவிட்டது.... என்னுடைய கோரிக்கை இதை வவுனியா வாழ் தமிழ் மக்கள் புறக்கணிக்க வேண்டும்...

யுத்தம் முடிந்துவிட்டதென்று கூறி இரண்டு வருடங்கள் ஆகிவிட்டது ஆனாலும் எங்கள் தாயக பூமியில் எங்கள் உறவுகள் இன்னும் நிராதரவாக்கப்பட்டே இருக்கிறார்கள். யாழ்குடாநாட்டில் இளவயது கருக்கலைப்பு அதிகரிப்பு, யுத்தத்தால் பாதிக்கப்பட்ட அப்பாவிச் பெண்களிற்கு வேலை வாங்கித்தருவதாக கூறி பாலியல் தொழிலில் ஈடுபடவைத்தல், எங்கள் உறவுகளை கொன்ற குவித்த நேரடிக் காட்சிகள் வெளியிடுவதல் என்று எங்கள் மக்கள் சீரழிவின் பாதையை நோக்கி பயனித்துக் கொண்டிருக்கிறார்கள்...

இவர்களின் தேவைகளைத்தான் எங்களால் பூர்த்தி செய்யமுடியவில்லை, இவர்கள் கண்ணீர் விடும் போது நாங்கள் அதற்கு அமைதியாய் செவிமடுத்து ஆறுதல் கூறாவிட்டாலும் பரவாயில்லை.. இவர்கள் கண்ணீருக்கு மதிப்பளித்து அவர்களுக்கு எங்கள் அமைதிகளை பரிசளிப்போம்..

இந்தியாவிலே எங்கள் சகோதரர்கள் எங்களிற்காய் மெழுகுவர்த்தி ஏந்தி பிரார்த்தனை செய்திருக்கிறார்கள் என்பதை மறக்கவேண்டாம்...

நான் அங்கே போனால் என்ன...?? குடியா முழுகவிடப்போகிறது என்று நினைக்கும் சகோதரர்களே... இதே போன்ற நிலையை ஓர் நாள் எங்களுக்கும் வரலாம்.. அப்போது எங்களுக்காய் கண்ணீர்விட உறவுகள் வேண்டும்...

இல்லை நாங்கள் போவோம் என்று நீங்கள் எண்ணினால்.. நிச்சயமாக தமிழ் அன்னை உங்களை வாழ்த்தி அனுப்புவாள்..

இந்த கருத்தை சொல்வதற்கு எனக்கு தகுதியில்லை அல்லது இந்தப் பதிவு தனிமனித சுதந்திரத்தை மீறியது என்று நீங்கள் கருதினால்... தயவுசெய்து என்னை மன்னித்துவிடுங்கள்...

ஒரு பருந்தும்... பல காகங்களும்...

2011-06-26T20:59:00.001-07:00

கதிரவன் எல்லையில் மேலெழ
காக்கைக் கூட்டமொன்று நகர்கிறது
தனியே தன் கூட்டிலிருந்த பருந்தொன்றை
திட்டமிட்டு தாக்குகிறது..

பருந்து இதை எதிர்பார்திருந்தது - ஆனால்
இந்த தனிமையை இல்லை
புரியாத மொழி பேசும் காக்கைகளுடன்
தன் மொழி பேசும் காக்கைகளும் கண்டு
திகைத்து நின்றது - புன்முறுவலுடன்
கருங்காக்கைகளுடன் - ஓரத்தில்
பல வௌ்ளைக் காகங்களும் நின்றது
கண்டு புரிந்த நின்றது - பருந்து

எண்ணிக்கையில், பலத்தில் மேலெழுந்த
காக்கைக்கூட்டத்தின் முன்
பருநதின் நிலை தோல்வியை நோக்கியது..
கொண்டு குணமும் - கொதிக்கும் இரத்தமும்
கொண்ட பருந்து - அன்று
நில்லாமல் போராடியது - தம்
எண்ணிக்கைக்கு எட்டமுடியாத
காக்கைகளை விரட்ட முற்பட்டது..

தன்னைக் காக்க தன் சகோதரர்
வருவர் என்று தனித்திருந்தது
பாவம் அன்று தெரியவில்லை - தன்
சகோதரர் என்றிருந்தது - பருந்துகளல்ல
நரிகள் என்று..

பருந்தின் இறக்கை தாக்கப்படுகிறது
மூர்க்கத்னத் தாக்குதலில்
கண்பறிக்கப்படுகிறது
போராடியது - விடாமல்
போராடியது...
வீரம் உதிரச் சொத்து அதற்கு

இறுதியில் பருந்து வீழ்த்தப்படுகிறது
தோற்றம் சிதைக்கப்படுகிறது.....
வீரவெற்றி பெற்றதாக கரைந்துகொண்டே
காகங்கள் பறந்து செல்கின்றன

முடிவில்..
பருந்தின் சிதையாத
கூட்டிலிருந்து சில பருந்துக் குஞ்சுகள்
கண் திறக்கின்றன....

-மோனி..

எழுதிக்கொள் இதனை... நான் ஓர் தமிழன்...

2011-06-20T00:20:00.001-07:00

('வாக்குமூலம்..' என்ற பாலஸ்தீனக் கவிதையை தழுவி நான் எழுதிய கவிதை இது...)

எழுதிக்கொள் இதனை
நான் ஓர் தமிழன்
எனது அடையாள அட்டையில் - மட்டுமே
'நான்' என்ற அடையாளம் கொண்டவன்
கோபமா உனக்கு..??

எழுதிக்கொள் இதனை
நான் ஓர் தமிழன்
எழுதும் எனது பெயரும்
போகவிருக்கும் சவப்பெட்டியும்
தவிர
ஒன்றும் இல்லை எனக்கு
ஆனாலும் - உன்
கருணை கேட்டு இரந்திட மாட்டேன்
உனக்கு முழந்தாளிட்டு பணிந்திடேன்
மாறாக - என்
பாதங்களில் இறந்துபோவேன்..

எழுதிக்கொள் இதனை
நான் ஓர் தமிழன்
கல் தோன்றி மண்தோன்றமுன்
தோன்றி
வெயிலும் சோலையும்
பாராட்டிய வீரமண்ணை
சேர்ந்தவன் நான் - என்
மரணங்கள் உன்
வெற்றியை கொன்றே செல்லும்

எழுதிக்கொள் இதனை
நான் ஓர் தமிழன்
என் கண்களைப்போலவே
என் தலைமயிரும் கறுப்பு
எனது விலாசம்,
மறுக்கப்பட்ட ஒரு தூாரத்து கிராமத்தில்
நீ கொண்டுவந்த குடியேற்றங்களால்
ஒதுக்கப்பட்ட குப்பைமேடு அது
அதன் தெருக்களுக்கு பெயரில்லை
வாழ்வுகளுக்கு நாதியில்லை
அங்கே வந்தென்னை கேள்
நான் என்று நாம் வருவோம்

எழுதிக்கொள் இதனை
நான் ஓர் தமிழன்
எனது நிலத்தை திருடினாய்
நீ
எனது சகோதரிகளை சூறையாடினாய்
நீ
எனது குழந்தைகளை கொன்றாய்
நீ
நீ விட்டுவைத்தது இந்த
வனாந்திரம் மட்டுமே...

இவை அனைத்துக்கும் மேல்
இதனையும் எழுது - நான்
யாரையும் வெறுப்பவன் அல்ல
யாரையும் கொள்ளை அடித்தவன் அல்ல

ஆனாலும்- நீ
கவனம்
முடிவுகள் என்றுமே நிலையற்றது...

-மோனி..

தமிழா...!! உனக்கிந்த குரல் கேட்கவில்லையா...??

2011-06-19T01:46:00.000-07:00

யாரோ கூப்பிடும் குரல் கேட்டு
விழித்துக் கொண்டேன்

அரை நித்திரையிலிருந்து
யாரோ என்னை கூப்பிடவதுபோலிருந்தால்
விழித்துக்கொண்டேன்

அபயத்தின், வலியின்,
மரணத்தின், கோபத்தின்
அழைப்பின் குரலது..

குரலின் சொந்தம் தேடி
ஊரும் இடமும் தேடினான்
யாரும் புலப்படவில்லை

மீண்டும் புரண்டு புரண்டு படுத்தேன்
அதே குரல் மீண்டும் கேட்டு
மீண்டும் விளித்துனக்கொண்டனே்..

புரிகிறது, அந்த குரல்
வெளியிருந்தல்ல - என் உள்ளிருந்து
கேட்கிறது..

தமிழா...!! உனக்கிந்த குரல் கேட்கவில்லையா...??

-மோனி..

மூத்த தமிழனுக்கு...

2011-05-16T02:15:00.001-07:00

தமிழில் முக்குளித்து
மந்திரமொழி உரைத்து

தமிழ்பெற்ற மூத்த மகன்
என்றிருந்தோம் உன்னை.

பதவிதனைத் துறந்து - தம்பி
உயர் குடித்த - பாசிச
வெறி பிடித்த - கயவர்
இருக்கை வேரறுத்து - வருவான்
என்றிருந்தாள் தமிழ் அன்னை..

கற்பைப் பறிகொடுத்து
கதறினாள் தமிழ்ப்பெண் இங்கே
பதவி வெறி பிடித்து
மதியது தறி கெட்டு
உணராமல் இருந்தாய் நீ அங்கே..

கால் மேல் கால் போட்டு
எக்காளம் தான் கொண்டு
இருக்காதே என்றுரைத்தோம்
அன்று - இன்றுன்
நரித்தோல் உரித்து
வஞ்சகந்தான் வெறுத்து
துாக்கி எறிந்துவிட்டனர்
உன்னவர் அங்கே...

இன்றுவந்த 'அவள்' ஒன்றும்
தேவதை இல்லைதான் எமக்கு - இனி
எம் மூக்கு போனாலும் சரி - உன்
சகுனம் பிழைத்தால் போதும்..

தமிழனைப்புதை்துவிட்டாய் - அவன்
கனவுகள் தூங்கவில்லை - புதைகுழிகளும்
கதை சொல்லும் - நாம் மீண்டோம்
என்று வரலாறுதான் சொல்லும்

ஆலமரத்திற்கு வித்திட்டிருக்கிறோம - அது
விருட்சமாய் வளர காவல் நிற்போம்
பின்னை அதை அழிக்க - இனி
யாராலும் முடியாது...

-மோனி..

சே, அசெஞ்சே.... தயவுசெய்து நிகராக ஒப்பிடாதீர்கள்.

2011-05-06T08:14:00.000-07:00

இந்தப் பதிவு பலரது எதிர்க் கருத்துக்களைத தூண்டலாம்.. இது என் தாழ்மையான வேண்டுகோள் மாத்திரமே..

அண்மையில் பேஸ்புக்கில் சேயின் முகத்திற்கு ஜீலியன் அசெஞ்சேயின் முகத்தை மோர்ப் செய்து ஒரு புகைப்படத்தைக் கண்டேன்.. (கீழே காட்டப்பட்டுள்ளது..).. இதை உங்களில் பலரே கண்டிருப்பீர்கள்...

இதை பலர் பகிர்ந்திருந்தது மிகவும் மனவருத்தத்தை ஏற்படுத்தியது.. தயவுசெய்து சேயிற்கு நிகராக ஒப்பிடாதீர்கள்.. அது யாராக இருந்தாலும் சரி...

சே குவேரா, இந்த உலகத்தில் இன்னும் எத்தனையோ அடிமைப்படுத்தப்பட்ட மக்களின் நெஞ்சில் எரிந்து கொண்டிருக்கும் புரட்சித் தீ, தன் உயிரையே கொடுத்து அடிமைத்தனத்திற்கும் ஏகாதிபத்தியத்திற்கும் எதிராக குரல் கொடுத்தவன், மக்களிற்காள அப்பழுக்கற்ற தலைவன். பிறந்து ஊர் ஆர்ஜென்டீனா ஆனால் கியூபா, கொங்கோ, பொலிவியா என்று சர்வாதிகாரம் மக்களை நசுக்கிக் கொண்டிருந்த இடங்களிற்கு சென்று மக்களிற்காக மக்களோடு நின்று போராடினார்.

இளமையில் துடிப்பும், மனிதத்திற்கான விளிப்பும் கொண்டு மக்களின் விடியலிற்காய் பாடுபட்ட ஒரு தலைவன். அவர் நினைத்திருந்தால் ஆர்ஜென்டீனாவில் தன்னுடைய காதலுடன் மருத்துவராக இருந்திருக்கலாம். கடைசி கியூபாவில் கொடுக்கப்பட்ட அமைச்சர் பதவியில் சொகுசாக வாழ்ந்திருக்கலாம். அவ்வாறு செய்யாமல் மக்களிற்காக போராடி மண்ணிற்கு விதைக்கப்பட்டான்... சுதந்திரம் என்ற விருட்சம் வளர...

அசெஞ்சே, மேற்கத்தையே ஏகாதிபத்தியத்தின் அதிலும் முக்கியமான உலகத்திற்கே கட்டப் பஞ்சாயத்து செய்து கொண்டிருக்கும் அமெரிக்காவின் உண்மை வடிவத்தை தோலுரிக்கும் ஒருவன்... விக்கிலீக்ஸ், பேரைக் கேட்டாலே சும்மா அதிருதில்ல.. என்ற கணக்கில் உலக நாடுகளின் தலைவர்களை கட்டுப்படுத்தும் ஒருவன்..

அசெஞ்சேயின் செயல் மிகவும் பாராட்டிற்குரியதாகவும்.. அவருடைய துணிச்சலுக்கு சலாம்.. அதற்கு பின்நிற்கவும் நாங்கள் செய்யலாம்.. ஆனால் சேயிற்கு நிகராக இயலாது..

எனது வேண்டுகோள் இதுதான்.. சேயிற்கு நிகராக அவரை மட்டுமல்ல யாரையும் சொல்ல முடியாது..

"மாபெரும் ஆன்மா ஒன்று மனிதகுலத்தை ஒன்றுக்கொன்று பகைமையான இரண்டு பகுதிகளாக பிரிக்குமேயானால், நான் மக்களோடுதான் இருப்பேன். அது இந்த இரவில் ஒரு விதியாக எழுதப்பட்டுவிட்டது..."
-சே...

-மோனி..

மன்மத தகனம்...(கவிதை)

2011-05-06T05:59:00.000-07:00

(ஆத்திகர்கள் என்னை மன்னிக்க வேண்டும்.. இங்கு கடவுளரை நான் கிண்டல் செய்யவில்லை.. இவை வெறும் குறியீடுகளே..)

தேவலோகத்தில் ஒரே சத்தம்..
வார்த்தைகளின் வாதம்..
காதில் விழுந்த ஓசைகள்
உதட்டில் தெறித்தன..

வழக்கம் போலதான்..
கதை ஒன்று
கதாபாத்திரம் வேறு
யார் பெரியவன் என்ற சண்டை
மன்மதனுக்கும் சிவனுக்கும்

சிவன்..
'உன்னை என் பார்வையில் எரித்தேன்..'
மன்மதன்
'இருந்தும் உம்மை வென்றேன்..'

சாட்சிகள் அழைக்கப்பட்டனர்...

பிரம்மாவும் விஷ்ணுவும் கூண்டேற்றபட்டார்கள்
சாட்சியாக சத்தியம் கூற
'நான் அடியைக் கண்டேன்..'
என்று பிரம்மா
'நானும் முடியைக் கண்டேன்..'
என்று விஷ்ணு

பொய்மையோடு
மன்மதனின் பக்கம் ஓங்கி வந்தது
வாய்மையோடு
சிவனின் பக்கம் தாழ்ந்து சென்றது

இந்திரன் 'சிவன் பிச்சை எடுத்தான்..'
சனி 'நான் அவனை பிடித்தேன்..'
என்றான்..
'இவன் பித்தன்..','பேய்களுடன் ஆடுபவன்..'
குரல்கள் ஒலித்தது...
கோபம் பொறுமையின்
எல்லை கடந்தது...

உண்மையின் வேகம்
சிவனின் கோபமாய்...
நெற்றிக் கண் கனல எரிந்தான்
மன்மதன்..
இந்த முறை மீள முடியாமல்

நிசப்பதம்...
தேவ கூட்டம் கலைந்தது

இனி...
பாவம் உமாதேவியார்...

-மோனி...

The Prestige - ஹாலிவூட் சினிமா

2011-05-05T04:01:00.000-07:00

நிறைய நாட்களாக சினிமா பற்றி ஒரு பதிவும் எழுதவில்லை என்ற வருத்தத்தைத் தீர்க்க இந்தப் பதிவுடன் உங்களை சந்திக்கிறேன்.

Christoper Nolan.. எனக்கு மிகவும் பிடித்த இயக்குனர். அவருடைய படங்கள் எப்போதும் நெஞ்சில் ஒரு சுமையை எப்போதும் சுமக்க வைக்கும். பொழுதுபோக்கிற்கான அம்சமும், விறுவிறுப்பும் அதே சமயம் இழையோடிய ஒரு சோகத்தையும் சுமந்தே அவருடைய படங்கள் காணப்படும். அவருடைய படங்களில் என்னை மிகவும் கவர்ந்த படம் Memento அதற்கு அடுத்தது என்றால் இந்தப் படம்தான்.

Christopher Priest என்ற நாவலாசிரியால் எழுதப்பட்ட The Prestige என்ற நாவலை தழுவியே டைரக்கடரும் அவரது சகோதரர் Johnathan Nolan இணைந்து திரைக்கதை எழுதி படம் வெளிவந்தது. இது இரண்டு ஒஸ்கார் விருதுகளுக்கும் பரிந்துரைக்கப்பட்டது.

லண்டன் நகரில் பத்தொன்பதாம் நூாற்றாண்டின் இறுதியில் Robert Angier, அவருடைய உயிரிற்கு உயிரான மனைவி Julia McCullough, Alfred Borden நண்பர்களாக ஒரு மாயாஜால வித்தைக்காரின் கீழ் உதவியாளர்களாக பணிபுரிகிறார்கள். ஆனால் ஒரு காட்சியின் போது Julia இறந்து போகிறார். இதற்கு Alfred தான் காரணம் என்று Robert குற்றம் சாற்றுகிறார். இது இவர்கள் இருவரையும் எதிரிகளாக மாற்றுகிறது. இருவரும் நாட்டின் சிறந்த வித்தகர்களாக மாறுகிறார்கள். ஆனால் ஒரு காட்சியில் Alfred சிறந்த வித்தை ன்றை நிகழ்த்த.. அந்த வித்தைக்கான ரகசியத்தை கண்டுபிடிக்க வேண்டும் என்ற வெறி Robertஐ ஆட்கொள்கிறது.. இது ஏற்படுத்தும் விளைவுகள்தான் படத்தின் மொத்தக் கதை..
'பொறாமை' என்பதுதான கதையின் 'ஒன்லைன்'.. இதில் நொலான் ஒரு மாயாஜாலவித்தகரின் தனிப்பட்ட வாழ்க்கையையும் அதில் உள்ள குழப்பங்களையும் சிறப்பாக காட்டி இருக்கிறார்.

எதிர்பார்க்காத திருப்பங்கள், மயிர்க்கூச்செறியும் கிளைமாக்ஸ் என்று கதை முடிகிறது.. கட்டாயம் எல்லாரும் பார்க்க வேண்டிய படம். எத்தனை முறை வேண்டும் என்றாலும் பார்ககலாம்

நடிப்பு சொல்லவே தேவையில்லை Robertஆக Hugh Jackmanம் Alfred Bordenஆக Christian Bale ம் அசத்தியிருப்பார்கள். ஒவ்வொரு பரேமும் ரசிக்கும்படியாக இருந்தது.

இது ஒரு சிறந்த பொழுதுபோக்கு படம் ஆனால் ஒரு ஆரட்டிஸ்டிக் படங்களுக்கான தகுதிகள் யாவற்றையும் கொண்டிருக்கும். இப்படிப் படங்கள் அருமை.. பெரிய வெற்றியையும் பாரிய வசூலையும் அள்ளித் தந்த படம்...

கட்டாயம் பாருங்கள்..

-மோனி

ஒசாமாவின் மரணம் - உலக அரசியல், பொருளாதாரத்தில் ஏற்படுத்தப்போகும் மாற்றங்கள்...

2011-05-05T00:11:00.000-07:00

செப்டம்பர் 11 உடன் ஒசாமா என்ற ஒரு தனிமனிதன் இந்த உலகத்தின் போக்கையே தலைகீழாக திருப்பிப்போட்டான். அதுவரை தங்களை உலகத்தின் வல்லரசு என்று மார்தட்டி வந்த அமெரிக்காவின் முகத்தில் ஓங்கி அடித்தான். அமெரிக்காவின் பாதுகாப்பு. பொருளாதாரம், புலனாய்வு என்று மூன்று தூண்களை அடித்து நிலைகுலையச் செய்தான்.

பதிலடி கொடுக்க வேண்டும் என்று 'பயங்கரவாதம் மீதான போர்' என்று புதிதாக கண்டுபிடிக்கப்பட்ட சொற்பதத்துடன் ஜோர்ஜ் புஷ் முஸ்லீம் தேசங்கள் மீது தங்கள் ஏகாதிபத்திய வெறியை வெளிக்காட்டினார்கள். சந்தர்பத்திற்கு காத்திருந்து பாய்ந்தது போலவே அந்த யுத்தங்கள் காணப்பட்டது என்பது வெளிப்படை உண்மை. மீண்டும் ஒரு உலகப்போர் தொடங்கும் என்று எதிர்பாரக்கப்பட்ட போது பல முதுகு குத்தல்கள் மூலம் அது இல்லாமல் போனது. முதலில் ஆப்கானிஸ்தான், பிறகு ஈராக் என்று தங்கள் தாக்குதல்களை தொடுத்தார்கள். பின் ஈரான் மீது ஒரு யுத்தம் தொடுப்பது போல பாவனையை ஏற்படுத்தினார்கள்.

இராணுவ படையெடுப்புக்கள் அவர்கள் எதிர்பார்த்து போல இருக்கவில்லை. எதிரிகள் பின்வாங்கி வளங்களை பாதுகாத்துக் கொண்டு மக்களின் பலத்தை வைத்து சிறு சிறு தாக்குதல்களை நடத்தினார்கள். ஒரு சில முஸ்லீம் நாடுகள் அமெரிக்கா ஏகாதிபத்தியத்தின் பக்கம் நின்றாலும் பல நாடுகள் அமெரிக்க எதிர்ப்பு சக்திகளுக்கு நேரடியாவோ மறைமுகமாகவோ உதவி வந்தார்கள்.

இதனிடையில் அமெரிக்கா பொருளாதாரம் வரலாறு காணாத பெரும் வீழ்ச்சியைக் கண்டது. எத்தனையோ அமெரிக்கா கம்பெனிகள் பாங்கரப்ட் ஆகின, மக்கள் வேலை இல்லாமல் சாப்பாட்டிற்கே கஷ்டப்பட்டார்கள். இந்த பொருளாதார வீழ்ச்சி உலகத்தில் உள்ள எல்லா நாடுகளையும் ஒரு ஆட்டு ஆட்டியது. ஆனால் ஆச்சரியப்படும் வகையில் இந்தியா இதில் பாரிய சேதங்களை சந்திக்காமல் தவிர்த்துக் கொண்டது. இதுவே பின்பு தெற்காசிய பிராந்தியத்தில் மாற்றத்தை கொண்டு வந்தது.

இராணுவ தோல்வி, மக்கள் நேரடி எதிர்ப்பு, பொருளாதார வீழ்ச்சி, வேலைவாயப்பில்லாமை என்று அமெரிக்க வல்லரசு ஆட்டம் கண்டது. அதுவரை உலகத்திற்கே கட்டப்பஞ்சாயத்து செய்து கொண்டிருந்த நிலை போனது. அதன் விளைவு "பிராந்திய வல்லரசு" என்ற நிலை ஏற்பட்டது.

என்ன இந்த பிராந்திய வல்லரசு..?? அதாவது உலகத்தின் ஒவ்வொரு பிராந்தியங்களிலும் ஒவ்வொரு பலம் வாய்ந்த நாட்டின் ஆதிக்கம் ஓங்கி வந்தது. தெற்காசியாவில் பாகிஸ்தானின் அரசியல் ஸ்திரத்தன்மை அற்ற அல்லாடியதால் இந்திய பலம் ஓங்கியது. இதுதான் விடுதலைப்புலிகளின் தோல்விக்கும் இலங்கையில் வித்திட்டது என்பது வெளிப்படை. சீனா, ரஷ்யா என்று நாடுகள் தங்கள் பலங்களை மெல்ல மெல் வெளிப்படுத்தியது. இதில் முக்கியமான நிகழ்வு 2008ஆம் ஆண்டு ஜோர்ஜியா மீது ரஷ்யா நடத்திய தாக்குதல்.

உலக அரசியல் அரங்கில் அதிர வைத்த இராணுவ நடவடிக்கை இந்த படையெடுப்பு. ஜோர்ஜியா அமெரிக்காவின் கைப்பொம்மை என்பதும் ரஷ்யாவை கண்காணிப்பதற்கு அமெரிக்காவின் அவுட்போஸ்ட் என்பதும் வெளிப்படை. ஜோர்ஜியாவின் அரண்களை 2 மணி நேரங்களில் தகர்த்து உள் நுழைந்த ரஷ்ய இராணுவம் இந்த உலகத்திற்கு ஒரு செய்தியை அனுப்பியது.

அமெரிக்காவின் கைப்பிடி மெல்ல தளரந்து வரும் போதுதான் பராக் ஒபாமா அமெரிக்க அதிபரானார். அமெரிக்காவின் சரித்திரத்தை மாற்றிப்போட்ட நிகழ்வு - கறுப்பினர் ஒருத்தர் அதிபரானது. அவரை ஒரு கறுப்பு தேவதையாக சித்தரித்தார்கள். எதிரி நாடான கியூபாவுடன் கைகோர்த்தல். அதுவரை எதிரியாக இருந்து வெனிசுவேலா ஹகோ சார்வேஸ் உடன் கைகுலக்கல், படைகளை திரும்ப பெறல், திரும்ப பாரக்க வைக்கும் பொருளாதார சீர்திருத்தங்கள் என்று அமெரிக்கா மேடையை அதிர வைத்தார்.

இவருடைய பொருளாதார சீர்த்திருத்தங்கள் இவரின் மீது இருந்த செல்வாக்கை குறைத்து சென்றது. ஆனால் அதைப் பற்றி கவலைப்படாமல் அமெரிக்காதான் தனக்கு முக்கியம் என்ற போர்வையில் அவர் செய்த ஆட்சி அமெரிக்க வரலாற்றில் ஒரு புது நாடகம்.

ஆனால் அமெரிக்காவின் கை மீண்டும் மெல்ல மெல்ல அரசியல் அரங்கில் ஓங்கி வரத்தொடங்கியது. அதுவரை அதளபாதாளத்தில் சென்றுகொண்டிருந்த பொருளாதாரத்தின் வீழ்ச்சி இழுத்து நிறுத்தப்பட்டது. எகிப்திய புரட்சி, சூடான் வீழ்ச்சி, கடாபியின் பின்வாங்கல் என்று உலக அரசியலே அல்லாடிக் கொண்டிருக்கும் போது...

சில சில இடத்தில் அமெரிக்கா மறைமுக காய்நகர்ததல்களின் மூலம் வெற்றிகளை கண்டுவந்த அமெரிக்காவிற்கு லட்டு மாதிரி வந்தது ஒசாமாவின் வீழ்ச்சி....

"Justice is done." என்ற ஒபாமாவின் அறிக்கையுடன் இனி உலக அரசியலில் ஒரு மாபெரும் மாற்றத்தை எதிர்பார்கலாம். அமெரிக்காவிடமிருந்து யாரும் ஔிய முடியாது என்று ஒபாமா எல்லா நாடுகளிற்கும் ஒரு செய்தியை கூறியிருக்கிறார். பின் லேடனின் வீழச்சியுடன் அல்கைதாவின் எதிர்காலமும் கேள்விக்குறி ஆகவிடும்...

பயங்கரவாதத்தின் மீது கடந்த தசாப்த காலமாக நடத்தி வந்த யுத்தம் ஒரு வழியாக ஓய்விற்கு வந்தவிட இனி அமெரிக்காவின் முழு கவனமும் சீனா மீது இருக்கும் என அரசியல் வல்லுனர்கள் எதிர்பார்கிறாரகள். ஒசாமாவின் மரணத்தை சீனா வரவேற்று அறிக்கை விட்டிருந்தாலும் அடிப்படையில் அவர்களுக்கு கெட்ட செய்தி.

பொருளாதாரத்தைப் பொறுத்தவரை அமெரிக்காவின் பொருளாதாரத்தில் மட்டுமல்லாது உலக பொருளாதாரத்தில் பாரிய மாற்றங்களை எதிர்ப்பார்கலாம். அது சாதகமாவே அமையும்.

இதை விட தற்போது இந்தியா அரசியல் நெருக்கடி, ஜப்பான் இயற்கை அனர்த்தம், ரஷ்யாவில் புட்டினிற்கும் ரஷ்ய அதிபரிற்கும் இடையில் உள்ள அரசியல் குழப்பம் என்று மற்றை நாடுகளின் தள்ளாட்த்தை அமெரிக்கா தனக்கு சாதகமாக உபயோகித்துக் கொள்ளப் பார்க்கும்...

இதன் விளைவு .... "History Repeats Itself"

-மோனி...

(இந்தக் கட்டுரை எழுதுவதற்குரிய அறிவு எனக்கில்லை. நான் இதுவரை வாசித்த தகவல்களின் திரட்டி கொஞ்சம் பகுத்தறிவு கலந்தது..)

100 வருடங்களாக தீரக்கப்படாத கணித புதிரைத்தீர்ததார் ஒரு கணித மேதை...

2011-05-04T09:02:00.000-07:00

ஒசாமா, ஒபாமா என்பதற்கு அப்பால் இப்படிப்பட்ட விடயங்களும் இந்த உலகத்தில் உள்ளது என்பதை நிரூபித்துள்ளார் ரஷ்ய கணித மேதை Grigory Perelma...

1904 ஆம் ஆண்டு முன்வைக்கப்பட்ட Poincare conjecture theorem இதுவரை கணித உலகில் தீர்க்கப்படாத ஒரு புதிராக காணப்பட்டது. அதாவது துளையில்லாத எந்தவொரு முப்பரிமாண உருவத்தையும் ஒரு கோளமாக ஆக்க முடியும் என்று முன்வைக்கபட்ட வாதத்தை கணித ரீதியாக நிரூபிப்பது.

சொல்றதுக்குத்தான் இது இலகுவாக இருக்கிறது. ஆனால் அதை தீர்க்க முயன்று எத்தனையோ பேர் தோற்று போயிருக்கிறார்கள்.

ஆனால் 2002 மற்றும் 2003 ஆம் ஆண்டு Grigory Perelma இதற்கான இரண்டு நிறுவல்களை வெளியிட்டார். அதை சரியான நிறுவல் என அடையாளம் காண கணிதவியலாளர்களுக்கு 7 வருடங்கள் சென்றது..!!! அதை கடந்த வருடம் சரியான நிறுவல் என அறிவித்து Grigoryக்கு 1 மில்லியன் டோலர் பரிசும் கணிதவியலாளர்களின் நோபல் எனப்படும் பீல்டஸ் மெடலையும் கொடுத்தார்கள்.

ஆனால் அவர் அந்த பணப்பரிசை ஏற்க மறுத்துவிட்டார்...!!! அதற்கு அவர் கூறிய காரணம்..

"வெறுமை இந்த உலகத்தின் எல்லா மூலையிலும் உள்ளது... அதை நாங்கள் கணிக்கவும் இயலும். இது எங்களுக்கு பல வாய்ப்புக்களை அளிக்கிறது. இந்த அண்டத்தை எப்படிக் கட்டுப்படுத்துவது என்று எனக்கு தெரியும்போது ஏன் 1 மில்லியனுக்கு பின்னால் ஓடவேண்டும்...?"..

இவன் கிறுக்கன் என்று உங்களில் சிலர் கூறுவது போல உள்ளது.. ஆனால் என்னைப் பொறுத்தவரை இவருக்கு சிலை வைக்க வேண்டும்...

இதில் இன்னும் சுவாரஸ்யமான விடயம் என்னவென்றால்.. இவரிடம் நீங்கள் இதை எப்படித் தீர்த்தீர்கள் என்று கேட்ட கேள்விக்கு அவர் சொன்ன பதில்...

"பைபிளில் யேசு நீரில் நடந்தார் என்று கூறப்பட்டது. அவர் அவ்வாறு நீரில் மூழ்காமல் நடப்பதற்கு என்ன வேகத்தில் நடந்திருப்பார் என்று யோசித்தேன் விடை வந்தது..."

ஆனால் தற்போது ஊடகவியலாளர்களிடம் இருக்கும் மில்லியன் டொலர் கேள்வி..

"இவரிற்கு நிகங்களையோ தலைமயிரையோ வெட்டும் பழக்கம் உண்டா..??"

இப்படியும் சில மனிதர்கள்....

(நன்றி :- டைம் இணையதளம்)

நரகத்தில் இருந்து டிவிட்டரில் ஒசாமா...!!!

2011-05-04T00:18:00.000-07:00

சதாம் ஹசைன். அடோல்ப் ஹிட்லர் என்ற வரிசையில் தற்போது ஒசாமாவும் நரகத்ததில் இருந்து டிவிட்டரில் டிவிட் செய்து கொண்டிருக்கிறார்.

என்ன வழக்கம் போலதான் அமெரிக்க குசும்பு...

டிவிட்டரில் ஏற்கனவே ஒசாமாவின் பெயரில் பொய்யான கணக்கு திறந்து இருந்திருந்தது. அதை விட பல புதிய கணக்குகளும் போன ஞாயிறு திறக்கப்பட்டிருந்தது..

அதில் சில முக்கி டிவிட்ஸ்..

@OsamaBinIaden Osama Bin Laden

Obama thinks its a big deal that he found me....I've been on twitter this whole time #comeatmebro

@BinLadenInHell Osama Bin Laden

That Celine Dion music kept me up all friggin' night. Hell really sucks!

@BinLadenInHell Osama Bin Laden

That Celine Dion music kept me up all friggin' night. Hell really sucks!

@Real_Bin_Laden Osama bin Laden

OK, time for bed. All of the sudden, I am dead tired...oh...you see what I said there? I totally didn't even realize...That is funny...

@OsamaInHell Osama bin Laden

Oh good - turns out James Franco is teaching a class here next month.

@GhostOsama Osama Bin Laden

Well this sucks...I accidentally enabled location on my tweets.

மார்ட்டின் லூாதர் கிங்கின் வசனங்கள்

அடுததபடியாக டிவிட்டர் பேஸ்புக் போன்ற சமூக வலைத்தளங்களை ஆக்கிரமித்துக் கொண்டிருக்கும் அப்டேட்

"I mourn the loss of thousands of precious lives, but I will not rejoice in the death of one, not even an enemy. Returning hate for hate multiplies hate, adding deeper darkness to a night already devoid of stars. Darkness cannot drive out darkness: only light can do that. Hate cannot drive out hate: only love can do that." --Martin Luther King Jr.

( "நான் இறந்துபோன ஆயிரம் உயிர்களுக்காக கண்ணீர் விடுகிறேன் ஆனால் அவன் என் எதிரியாக இருந்தாலும் சரி, ஒருவனின் மரணத்திற்கை கண்டு களிக்க மாட்டேன்... . பலரது வெறுப்பிற்கு பதிலாக வெறுப்பைக் காட்டுவது என்பது நடசத்திரங்கள் அற்று இருண்டுபோன இரவிற்கு மேலும் இருட்டைக் கொடுப்பது போன்றது. இருள் இருளை விரட்டாது, ஔி மட்டுமே இருளை அடக்கும். வெறுப்பு வெறுப்பை விரட்டாது அன்பு ஒன்று மட்டும்தான் அதைச் செய்யும்...")

இது அமெரிக்காவில் கறுப்பின மக்களின் விடுதலைக்காக போராடிய தலைவரான மார்ட்டின் லூாதர் கிங் சொன்னதா சமூக வலைதளங்களில் உலவுகிறது. ஆனால் இது முற்று முழுதாக அவரால் கூறப்படவில்லையாம். கடைசியாக கூறப்பட்ட பகுதி மட்டும் தான் அவரால் கூறப்பட்டதாம். என்ன கொடுமை பாருங்க...??அதில கூட நொட்டை பிடிக்கிறாங்க..

தாக்குதல் நடத்தும் போது ஒசாமாவிடம் ஆயுதமில்லை

அமெரிக்கா இராணுவம் ஒசாமாவின் இருப்பிடத்தைத் தாக்கும் போது ஒசாமாவிடம் ஆயுதம் இருக்கவில்லையாம். இருந்தும் அவரை சுட்டுக் கொன்றது என்பது ஜெனிவா பிரகடனத்திற்கு எதிரானது...

அத்தோடு ஒசாமாவின் உடலின் உண்மையான படங்களை விரைவில் வெளிவிடுவோம் என்று CIA தலைவர் கூறியுள்ளார். இது ஏற்படுத்தப் போகும் தாக்கம் என்னவோ..

ஒசாமாவின் இருப்பிடத்திற்கு குவியும் விமரசனங்கள்

Google Maps ல் ஒசாமாவின் இருப்பிடத்திற்கு விமர்சனங்கள் குவிந்த வண்ணம் உள்ளனவாம். அதில் அதிக வரவேற்பைப் பெற்ற விமர்சனம்

"I heard that this place is now available (prior residents left suddenly and unexpectedly)."

(நன்றி :- www.huffingtonpost.com)

அமெரிக்காவால் இதுவரைத் தேடப்பட்ட மோஸ்ட் வான்ட்ட(Most Wanted) குற்றவாளிகளின் முக்கிய பட்டியல்...

2011-05-03T06:37:00.000-07:00

மே 1,2011 ஆம் திகதி அமெரிக்காவால் தேடப்பட்ட முக்கிய குற்றவாளியான ஒசாமா பின்லேடன் சுட்டுக் கொல்லப்பட்டதாக அறிவிக்கப்பட்டார். இந்நிலையில் அமெரிக்காவால் தேடப்பட்டு வந்து மிக முக்கிய குற்றவாளிகளின் பட்டியலைப் பாரக்கலாம். (இந்த தொகுப்பில் ஒசாமாவைத் தவிர்த்திருக்கிறேன்...)

Ted Bunty

உலகத்தில் பெண்களை மிகவும் கொடிய முறையில் கற்பழித்துக் கொன்ற சைகோ கொலைகாரன். 1978 ஆம் ஆண்டில் இருந்து பல பெண்களை பாலியல் வல்லுறவிற்கு உட்படுத்தி கொன்றிருக்கிறான். சிறைச்சாலையில் அடைக்கப்பட்டு இரண்டு தடவை தப்பி ஓடி பின்னர் பிடிக்கப்ட்டிருக்கிறான். தான் 28 பெண்களை வல்லுறவலிற்கு உட்படுத்தி கொன்றதாக ஏற்றுக் கொண்டிருந்தாலும் அந்த எண்ணிக்கை 100ஐத் தொடும் என்றே கூறப்படுகிறது. இவன் பெண்களைக் கொன்றுவிட்டு பிணங்களுடனும் செக்ஸ் வைத்திருக்கிறான். இவன் 1989 ஆம் தனது 43ஆவது வயதில் ஆண்டு மின்சாரக் கதிரை தண்டனை்க்குட்படுத்தப்பட்டு கொலை செய்யப்பட்டான்....

James Earl Ray

கடைகளில் திருடுதல், மெயில் பிராட் என்று சிறுதாக தொடங்கிய தன் குற்றத்தை ஏப்ரல் 4, 1968 ஆம் ஆண்டு அமெரிக்காவில் உள்ள கறுப்பின மக்களின் சம உரிமைக்காக போராடிய மார்ட்டின் லூாதர்கிங்கைக் கொன்றதன் மூலம் அமெரிக்காவால் தேடப்பட்ட முக்கிய குற்றவாளியானான். பின்னர் பொலிஸாரால் பிடிக்கப்பட்டு 99 வருட தண்டனை விதிக்கப்பட்டது. ஆனால் தனது 70வது வயதில் ஹெபடைட்டிஸ் நோயால் 1998ஆம் ஆண்டு இறந்துபோனான்.

Ruth Eisemann-Schier

FBI ஆல் தேடப்பட்ட முதல் பெண்குற்றவாளியாக பட்டியலில் சேர்க்கப்பட்டார். தனது 26வது வயதில் கல்லூாரயில் படிக்கும் போது இவரும் இவரது காதலரும் Barbara Jane Mackle என்ற 20 வயது செல்வந்த வீட்டு கல்லூரி மாணவியைக் கடத்தி கப்பம் கேட்டார்கள். பின்னர் அந்த கல்லூாரி மாணவி நிலத்தில் இருந்து 1 1/2 அடி ஆழத்தில் உள்ள ஒரு பெட்டியில் பத்திரமாக மீட்கப்பட்டார். இவரது காதலர் கிரிஷ்ட் கொஞ்ச நாட்களில் பொலிஸாரால் சிறைபிடிக்கப்பட்டார். இவர் 2 மாதங்கள் தலைமறைவு வாழ்கை வாழந்து பின் சரணடைந்து தன் குற்றத்தை ஒப்புக் கொண்டதோடு தன் காதலரின் தூண்டுகோலால்லால் தான் இதை செய்ததாகவும் கூறியிருக்கிறார். சில வருடங்கள் சிறைச்சாலையில் தண்டனை அனுபவித்து பின்னர் ஹொண்டோரஸ் நாட்டிற்கு நாடு கடத்தப்பட்டார்.

Daniel Andreas San Diego

தீவிரவாத பட்டியலில் சேர்ந்த முதல் அமெரிக்கன் என்ற பெருமை இவனையே சாரும். ஏப்ரல் 2009 சான் பிரான்ஸிஸ்கோவில் இரண்டு கட்டிடங்களுக்கு குண்டு வைத்து தகர்த்தான். இன்னமும் தேடப்பட்ட்டு வருகிறான்.

James "Whitey" Bulger

அமெரிக்கா பில்லா... கடத்தல், கொலை, ஹவாலா போன்ற வழக்குகளிற்காக தேடப்பட்டு வருகிறான். ஒசாமாவிற்கு அடுத்ததாக தேடப்பட்டு வருகிறான். அதிக வயதில் தேடப்பட்டு வருகிறான்(1999ம் ஆண்டு 69 வயது) என்ற பெருமை இவனையே சாரும் . இவனது தலைக்கு 2 மில்லியன் ரூபா விதிக்கப்பட்டுள்ளது.

Juan Garcia Abrego

போதைப்பொருள் கடத்தல் மன்னன்... மெக்‌ஸிகோவிலிருந்து 15 டான் கொக்கையின் கடத்தியுள்ளான். அமெரிக்காவால் தேடப்பட்டவருபவர்கள் பட்டியலில் 1995 ஆண்டில் இடம்பெற்ற முதலாவது போதைக்கடத்தல் மன்னன். 1996ஆம் ஆண்டு பிடிக்கப்பட்டு 11 ஆயுள்தண்டனை விதிக்கப்பட்டு தற்போது சிறையில் உள்ளான்.

நன்றி :- Time.com..

ஓசாமா கொலை.. முடிவற்ற பயணம்...

2011-05-01T23:57:00.000-07:00

உலகத்தின் மிகவும் பலமும் பயங்கரமும் மிக்க ஒசாமா பின்லேடனை தாங்கள் கொன்றுவிட்டோம் என்று அமெரிக்க ஜனாதிபதி ஒபாமா அறிக்கை வெளியிட்டுள்ளார். நேற்று ஒபாமா வெளியிட்ட அறிக்கையில் "..இதுவரை அல்குவைதா இயக்கத்தை அழிக்க எடுக்கப்பட்ட முயற்சியில் மிகவும் முக்கியமான வெற்றி.."

அவர் மேலும் கூறுகையில் "..இஸ்லாமாபாடிற்கு வடக்கே அபொட்டாபாட் என்ற இடத்தில் உள்ள வீட்டில் தங்கியிருந்த பின்லேடனை அமெரிக்க இராணுவம் குழுக்களாக சென்று தாக்கி கொன்று. அவரது உடலையும் கைப்பற்றி உள்ளதாக அறிவித்துள்ளது.."

இந்த தாக்குதலிற்கான வீடியோ ஆதாரத்தையும் அமெரிக்கா வெளியிட்டுள்ளது. இதை வௌ்ளை மாளிகைக்கு வெளியில் நின்று பாரத்த மக்கள் ஆரவாரம் செய்தனர்.

ஏற்கனவே பலமுறை பின் லேடனைத் தாங்கள் கொன்று விட்டதாக அமெரிக்கா கூறிவந்தது உண்மை. அவ்வாறு கூறி கொஞ்ச நாட்களில் ஒசாமாவிடமிருந்து டேப் வருவதும் வாடிக்கை . இந்த முறை என்னவோ தெரியவில்லை. ஆனால் அவ்வாறு உண்மையில் கொன்றிருந்தாலும் என்னைப் பொறுத்தவரைக்கும் அமெரிக்கா மார்தட்டி கொள்வதற்கு ஒன்றுமில்லை. பின்லேடன் ஏற்கனவே கிட்னி பிரச்சினையில் உடல் நலக்குறைவில் அவதிப்பட்டிருந்தான்.

சோவியத் ரஷ்யாவை எதிர்க்க அமெரிக்காவால் உருவாக்கப்பட்மவன்தான் இந்த பின்லேடன். வளர்தத கடா மார்பில் பாய்ந்த கதை இதற்குத்தான் நன்றாக பொருந்தும். சோவியத்தின் வீழ்ச்சிக்குப் பின் அமெரிக்கா தனிப்பெரும் வல்லரசாக வளர்ந்து மற்றைய நாடுகளை சுரண்ட ஆரம்பித்தது. இதை எதிர்க்க பின் லேடன் பயங்கரமான செயல்களை செய்துள்ளான். பல அப்பாவி மக்களைக் கொன்றிருக்கிறார்தான். ஆனால் அதற்கு அமெரிக்கா ஏகாதிபத்தியத்தும் அதற்கு சளைத்ததில்லை எனபது உண்மை.

மீண்டும் எத்தனையோ பின்லேடன் உருவாகலாம். அமெரிக்க ஏகாதிபத்தியத்தை எதிர்க்கலாம். அல்கைதா விடுதலைப்புலிகளைப்போல ஒரு நாட்டில் மட்டும் நின்று போராடிய இயக்கம் இல்லை. அமெரிக்க ஏகாதிபபத்தியம் இருக்கும் வரை பின்லேடன்கள் இருப்பார்கள்.

கனவாய்ப்போகுமோ என்று...

2011-05-01T08:22:00.000-07:00

அலையும் உயிர்கள் வாழும்
பூமியிது பெருவெளியாம் - நிலை
குலையும் நாங்கள் வாழும்
வாழ்க்கை ஒரு சிறு சிறையாம்

கருவறை சிறை - போனபின்
கல்லறைசிறை - தோல்வியால்
இலட்சியம் சிறை - வெற்றிக்குப்பின்
அலட்சியம் சிறை - நாமில்
நான் சிறை - பூமிக்கே
வான் சிறை...

வாழும் பிறப்பிது - ஒரு
முறைதான் - அதில்
உருவாக்கும் சிறைகள்தான்
எத்தனையோ..??

என்றொரு நாள்
நாமிலொரு நீ போகும் - குடும்ப
வாழக்கையின் துயர்தேடி
நானும் போக விரும்புகிறேன் - தேடாத
வாழ்க்கையின் வேர்தேடி

வாழ்ந்திட துடிக்கிறேன் - தினமொரு
முறை பிறந்திட நினைக்கிறேன் - ஆனால்
நிதமும் பதைக்கிறேன் - கனவென
இவை ஆகுமோயென்று....

-மோனி...

வானம் - எல்லையற்றது...

2011-04-29T01:22:00.000-07:00

வாசகர்கள் கவனத்திற்கு... இது வானம் படத்தின் விமர்சனம் அல்ல... மாறாக அதன் பாதிப்பால் ஏற்பட்ட பிதற்றல்...

பெரிய எதிர்ப்பாரப்புகள் ஏதும் இல்லாமல்தான் நான் படம் பாரக்க போனேன். ஆனால் ஒரு கனத்த மனத்துடன் திரும்பி வந்தேன். அது ஒரு திரைப்படம் என்று என் அறிவு ஏற்றுக்கொள்ள என்னால் இதுவரை முடியவில்லை. எல்லா விதத்திலும் அற்புதம்.

ஸ்டிஆர் என்று டைட்டில்ல போடும் போது எனக்கு பெரிதாக பிடிக்கவில்லை. இவ்வளவு பந்தா தேவைதானா என்று யோசிச்சன். ஆனால் சிம்பு.. நீங்க இந்த படம் நடிச்சதுக்கு எவ்வளவு பந்தா வேணும் என்றாலும் போடலாம்..

தீவிரவாதம், பகட்டு, அதிகார வெறி, சுயநலம், அறியாமை, இயலாமை போன்று இந்த உலகத்கில் ஊடுறிவிப்போன விடயங்களை நன்றாக சொல்லி இருக்கிறார். தற்கால சினிமாவில் ஒரு சிறிய விடயத்தை எடுத்து அதை மையப்படுத்தி விறுவிறுப்பான திரைக்கதை அமைக்கப்படும். ஆனால் மனித முதிர்ச்சிக்கு இதுவரை கிட்டாத விடயங்களை நன்றாக கையாண்டுள்ளார் இயக்குணர்.. அதை நெஞ்சுருகும் வித்த்தில் கொடுத்தும் உள்ளார்.

ஆஸ்பத்திரியில் உள்ள குழந்தை, அனுஷ்காவிற்கு கூட வரும் அரவாணி, லாரி ஓட்டுற சிங், கடைசியாக டிராக்டர் நம்பர் பிளேட்டில் கணக்கு போடும் சிறுவன் என்று ஒவ்வொரு விடயங்களையும் நன்றாக பார்த்து பார்து செதுக்கியுள்ளார் இயக்குணர்.

நடிப்பு சொல்லவே தேவையில்லை.. சிம்பு, பரத். பிரகாஷ்ராஜ், சரண்யா, அனுஷ்கா என்று எல்லாரும் கதைக்குள்ள ஒன்றிக்க வைத்துவிட்டனர்.

தமிழ் சினிமாவின் மசாலா பாணி பல இடங்களில் தெரிந்தாலும். அது மிகவும் நகச்சுவையாகவும் ரசிக்கும்படியாகவும் இருந்திச்சு...

படம் முழுக்க சிம்புதான தெரிவதுதான் சிம்பு பட வழக்கம். ஆனால் இதில எல்லாருக்கும் வாய்ப்பு இருந்திச்சு... இசையில யுவன் பிச்சிட்டாரு. அதுவும் "வானம்..." பாட்டு ஒவ்வொரு முறை ஒலிக்கும் போது அது மனசை தொடுகிறது. நிரவ்ஷாவின் கமராவைக் கவனிக்க முடயாத அளவிற்கு கண்கள் சில நேரம் கலங்கி போகிறது. அதிலயும் திருடிட்டு போன காசை சிம்பு மறுபடியும் கொடுக்கிற காட்சி அற்புதம்...

படத்ததில் குறைகள் இருக்குது... ஆனால் அதை கிளைமாக்ஸிற்காக கண்டுக்காம விடலாம். அன்பே சிவம், ரங் டீ பஸந்தீ (ஹிந்தி) போன்ற படங்களின் கிளைமாக்சிற்கு நிகரான நெஞ்சைத்தொடும் கிளைமாக்ஸ்...

அதிலயும் கடைசியா அனுஷ்கா சொல்ற டயலொக்..
"எப்படியும் வாழலாம் எண்டிருந்த எங்க வாழ்ககையை ஒரு நல்ல சாவு இப்படித்தான் வாழனும் என்று காட்டிருச்சு.." சூப்பர்..

வானம்.. என்றுமே எல்லையற்றது....

என் சிறு கவிதைகள்...

2011-04-26T02:52:00.000-07:00

(இது நான் எழுதி சிறு கவிதைகளின் ஒரு சிறு தொகுப்பு...)

கடைக் கண்ணாடிகளில்

விழுமெம் விம்பத்தை

இரசிக்கிறோம்...

எம்மை விட

அதிகமாக...

---------------------------------------------------------------------

பூமியில் உள்ளதாடா சொர்க்கம்

அடக்கி வைத்த மூத்திரத்தை

பெய்து பார் - அப்போது தெரியும்...

---------------------------------------------------------------------

அம்மாவை விடவும்

சொர்க்கமொன்று உண்டென்றால்

எவ்வளவு உன்னதமானது

அது...

---------------------------------------------------------------------

அண்ணாந்து வானம் பாரத்து

நிம்மதியடைகிறேன் - இன்னமும்

மேலே இடம் உள்ளது...

---------------------------------------------------------------------

'இதுவும் போய்விடும்...' என்றெழும்

கவிஞனும் காசுக்குத்தான்

எழுதுகிறான்.....

இனி என் பெயர் பிரேம சாய்பபாபா...

2011-04-24T07:45:00.000-07:00

தனக்கு மரணமே இல்லை. தான் கடவுள் என்றும். தான் இந்தப் பிறவியில் போனதும் மீண்டும் கர்நாடக மாநிலத்தில் பிரேம சாய்பாபா என்ற பெயரில் அவதரிப்பேன் என்று சத்திய சாய்பாபா கூறியிருந்தார்.

இதனால எத்தனை பெற்றோர் தங்களுடைய குழந்தையை தூக்கிட்டு பிரேம சாய்பாபா என்று கிளம்பபோறாங்களோ தெரியேல்ல.

ஆனா பாருங்க இதுதான் பிரேம சாய்பாபாவாம்... பார்க்க என்னை மாதிரியே இருக்கு என்று நண்பர்கள் சொல்றாங்க

அதனால முன்கூட்டியே எச்சரிக்கையாக ஒரு விண்ணப்பத்தை நானும் போட்டு வைக்கிறன்.

பின்ன வெட்டிய உட்காந்திக்கிட்டே தின்கிற யோகம் யாருக்கு கிடைக்கும். அந்த யோகம் எனக்கு கிடைக்காதா.

ஏன்பா கழுதை ஏதாவது இருக்கா...??

மயிர்ச்சடையானவர்க்கே மடங்கள் உண்டாக்குகிறோம்....

2011-04-23T07:49:00.000-07:00

ஒரு மனிதனின் மரணத்தை வைத்து விமர்சனங்களை வெளியிடுவது தவறானதுதான் ஆனால் நேற்று நடந்த சம்பவம் என்னை இந்த பதிவை எழுத வைத்துவிட்டது. இது யார் மனதையேனும் பாதிக்குமேயானால் என்னை மன்னிக்கவும். ஒரு மனிதனைப்பற்றி விமர்சிக்கும் தகுதி எனக்கில்லை.

நேற்று எனக்கு தெரிந்த உறவினர் வீட்டை போயிருந்தேன். அவர் தீவிர சாய் பாபா பக்தர். அவர் வீட்டில் கடந்த சில மாதங்களாக கடன் தொல்லையால் மிகுந்த பிரச்சினையில் உள்ளார். நேற்று வழமையை விட கவலையாக இருந்தார். ஏன்.. சாய்பாபாவின் உடல் நிலை மோசமாகிவிட்டது அவரை மருத்துவர்கள் கைவிட்டுவிட்டார்கள். எப்படியாவது போய் புட்டபத்தியில் பார்க்க வேண்டும்.

சாய்பாபா என்ற ஒரு தனிமனிதன், அவர் அப்படி என்ன சாதித்துவிட்டார். சாய் பக்தர்களை கேட்டால் சொல்வார்கள்.. "அவர் கடவுளாக வாழ்ந்தவர்.." என்ன கொடுமை இது... கடவுள் என்ற கருப்பொருளே இல்லை என்று விஞ்ஞானம் நீரூபிச்சிட்டு வருது இதில மனிதன் கடவுளா...??

நான் மறுக்கவில்லை எத்தனையோ மனிதர்கள் மக்கள் மத்தியில் கடவுளாக வாழ்கிறார்கள் காந்தி, மண்டேலா போன்ற பலர் உள்ளார்கள்தான். அவர்கள் தங்கள் வாழ்க்கையே மக்களுக்காக அர்பணித்தவர்கள்... அப்படி ஒரு தியாகத்தையும் பாபா செய்துவிடவில்லை...

சாய் டிரஸ்ட் பண்ட் எத்தனையோ ஏழை மக்களின் மருத்துவ கல்வி செலவிற்கு உதவியுள்ளது என்று பலர் மார் தட்டுகிறார்கள்.
சாய் பாபா தன்னுடைய சொந்த காசில இருந்தா செய்தார். மக்கள் கொடுத்த காசை மக்களுக்கே கொடுக்கிறது எப்படி பெருமை. அவர் பல சித்துகள் செய்தாராம்... சித்துகள் செய்துவிட்டால் கடவுள் ஆகிவிடுவாரா...?? இப்படித்தான் வாயில இருந்து லிங்கம் எடுக்கிற எத்தனை பேரிடம் ஏமாந்து போனோம்.

"சாயின் உடல் நிலைக்காக பக்தர்கள் வீசேட பிரார்த்தனை...".. என்ற செய்தியை பத்திரிக்கையில் வாசித்து மிகுந்த வருத்தப்பட்டேன். ஒருமனிதன் தன் அந்திம காலத்தில் போய் சேரவேண்டிய நேரத்தில் போய் சேருகிறார். அதைத் தடுக்க சோகமாக பெரிய பிரார்ததனைகள்... ஆனால் இங்கே ஈழத்தில் எத்தனையோ இளம் பிஞ்சுகள் பலியிடப்பட்ட போது யாருமே பேசவில்லை... அப்போது உங்கள் பிரார்த்தனைகள் எங்கே...??

இது எனக்கு ஜெயகாந்தனின் ஒரு கவிதை ஞாபகம் படுத்துகிறது....

நடந்தும் பிறந்தும் ஓடியும் ஊர்ந்தும்
நாமெலாமிங்கு அலைகின்றோம்
இடந்தெரியாமல் முகம் தெரியாமல்
   எவரையோ இங்கு தேடுகின்றோம்
தடமென ஒன்றுமில்லை நடந்து நடந்து
   தடங்கள் உண்டாக்குகின்றோம்
இடமென ஒன்றுமில்லை இருந்து - இருந்து
   இடங்கள் உண்டாக்குகன்றோம்
விடமென ஒன்றுமில்லை வெருண்டு வெருண்டு
   விடங்கள் உண்டாக்குகிறோம்
மடமென ஒன்றுமில்லை மயிர்ச்சடை யானவர்கே
   மடங்கள் உண்டாக்குகிறோம்....

எப்படி இருந்த நாங்க...

2011-04-23T00:44:00.000-07:00

எப்படி இருந்த நாங்க...

இப்படி ஆயிட்டம்....

சைமண்டசை குரங்கு என்று பேசி இனவாதத்தை தூாண்டினார் என்று கூறப்பட்ட ஹர்பஜன் சிங்கும், சைமண்டசும் ஒருவரை ஒருவர் பாராட்டிக் கொண்ட விதம் பார்ப்வரகளை ஆச்சரியப்பட வைத்துள்ளது....

பாசக்கார பயலுகள்பா...

அப்ப உங்க கோபம் எல்லாம் அவ்வளவும்தானா....??? போங்கப்பா...

இந்த அண்டத்தின் தொடக்கம் : கடவுளின் இருக்கை

2011-04-22T07:40:00.000-07:00

இதைப்பற்றி பலர் தங்களுடைய பதிவுகளை எழுதியுள்ளார்கள். அந்த வகையில் நான் முதலாதவனும் கிடையாது, கடைசியும் கிடையாது. ஆனால் எனக்கு தெரிந்தவற்றை பகிரவேண்டும் என்ற முனைப்புடனே இதை எழுதுகிறேன்...

இந்த உலகத்தில் மனிதன் சிந்திக்க தொடங்கிய காலங்களில் இருந்து ஒரு கேள்வி என்றுமே இருந்து வந்துள்ளது. அது இந்த பூமி எவ்வாறு உருவானது..?? அதை உருவாக்கியது யார்...?? அதாவது முட்டையில் இருந்து குஞ்சு வந்ததா...?? குஞ்சிலிருந்து முட்டை வந்ததா...?? என்றது.

கடவுள் ஒரு உணர்வுசார்ந்த நிலை... அதன் இருக்கையை பற்றி கேள்விகேட்பது முட்டாள்தனமானது எனற கூறுபவர்களுக்கு... நான் கூறவருவது ஒரு விஞ்ஞானம் நோக்கிய தேடல்....

காலம் காலமாக இந்த கேள்விகளுக்கான விடைகள் விஞ்ஞானத்தின் வளர்ச்சியுடன் மாறிவந்துள்ளது. பூமி தட்டையானது அது மாறாக உருண்டையாக இருந்திருந்தால் கடல் நீரெலல்லாம் வெளியில் கொட்டுண்டிருக்கும் என்ற அடிப்படைவாதக் கருத்தில் இருந்து மனிதன் இன்று SuperString, M theory என்று விரிவடைந்துவிட்டான். ஆனாலும் இந்தக் கேள்விகளுக்கான விடைகளை யாராலும் அறுதியாக கூற முடியவில்லை. கடவுள் என்ற இறுதியும் முடிவுமற்ற ஒரு பொருளே இந்த அண்டத்தை உருவாக்கியது என்ற கூறி ஒரு அணியினரும். இல்லை அது விஞ்ஞான சக்திகளால்தான் உருவாக்கப்பட்டது என்று இன்னொரு அணியினரும் இரு தரப்புகளில் நின்றுகொண்டு போரிடுகிறார்கள்.

இந்த கேள்விகளுக்கான விளக்கங்களை சொல்லும் அளவிற்கு எனக்கு அறிவு போதாது. மாறாக இந்த கேள்விகளுக்கானஒரு சில விளக்கங்களை 1988 ஆம் ஆண்டு Stephen Hawking என்ற பிரபல விஞ்ஞானியால் The origin of the universe என்கிற பேச்சிலிருந்து சில தகவல்களை தருகிறேன்.

அந்த தொகுப்பில் உள்ள பல விடயங்கள் கற்றுத்தேர்ந்த பௌதீகவியலாளர்களிற்கு மட்டுமே விளங்ககூடியது. எனக்கு அதில் உள்ள பல விடயங்களை பற்றி தெரியாது. உதாரணத்திற்கு அவர் கையாளும் General Relativity, Quantam mechanics போன்ற கொள்கைகள் பற்றிய சரியான அறிவு எனக்கு இல்லை.

அதாவது ஹபிளின் கண்டுபிடிப்பில் இருந்து உறுதி செய்யப்பட்ட அவதானங்களின் அடிப்படையின் அதுவரை நியூட்டன் கூறி வந்த நிலையான அண்டம் என்ற கொள்கை பொயக்கிறது. ஏன் ஐன்ஸடீனே கூட தன்னுடைய விசேட சார்புக் கொள்கையில் அண்டம் நிலையானது மாறாதது என்று கூறியுள்ளார். அப்படி இந்த அண்டத்தை நிலையாக வைப்பது cosmological constant என்று கூறுகிறார். ஆனால் பின்நாளில் அது இல்லை என்றும், அவ்வாறு தான் கூறியது பெரிய பிழை என்றும் ஏற்றுக்கொள்கிறார்.

அந்த வகையில் தன்னுடைய பேச்சில் ஹாக்கிங் அண்டம் ஒரு ஒருமைப்பாட்டில் இருந்து உருவாகவில்லை என்றும். அதற்கு சான்றாக தன்னுடைய no boundry கொள்கையையும் முன் வைக்கிறார்.

ஆனால் அவருடைய பேச்சில் எனக்கு மிகவும் முக்கியம் எனப்பட்ட கடைசிப் பந்தியை இங்கு மொழிபெயர்ப்புடன் சாராம்சத்தை தருகிறேன்.

"....என்னுடைய இந்தக் கொள்கையுடன். இந்த அண்டத்தின் உருவாக்கத்தின் போது பௌதீக விதிகள் செல்லாது என்ற கொள்கையை இல்லாமல் செய்கிறது. மாறாக இந்த அண்டத்தின் இயக்கம் உறுதிசெய்யப்பட்ட விஞ்ஞானக் கொள்கைகளின் பிரகாரம் இயங்குகிறது என்பது உண்மையாகிறது. அதாவது இந்த உலகத்தினதும் அண்டத்தினதும் மொத்த இயக்கத்தையும் விஞ்ஞானத்தால் விளங்கப்படுத்தமுடியும். அது இந்த அண்டத்தை கட்டுப்படுத்துவது கடவுள் இல்லை என்பதை கூறவருகிறது. அதாவது இந்த அண்டம் ஆரம்பத்தில் உருவாகிய விஞ்ஞான விதிகளின் பிரகாரம் இயங்கி வருகிறதே தவிர கடவுளின் கட்டுப்பாட்டில் இல்லை. ஆனால் இந்த அண்டம் ஏன் தன்னை உருவாக்கிக் கொள்ள முடிவெடுத்தது என்ற கேள்விக்கு என்னிடமோ விஞ்ஞானத்திடமோ விடை இல்லை. ஒருவேளை கடவுள் இந்த கேள்விக்கு பதில் சொல்லலாம்...."

மேலதிக வாசிப்பிற்கு :- http://www.ralentz.com/old/astro/hawking-1.html

இது பற்றி மேலதிக தகவல்களை பெறு விரும்புவர்கள். சுஜாதாவின் "கடவுள்" தொகுப்பை வாசிக்கவும்.

-மோனி...

ஜநா அறிக்கையும் தமிழன் நிதர்சனும்.... (எனது பார்வையில்)

2011-04-18T21:15:00.000-07:00

கசியவிடப்பட்ட ஐநா அறிக்கை...
இலங்கை அரசாங்கமும் விடுதலைப்புலிகளும் போரக்குற்றங்களை புரிந்திருக்கிறார்கள் என்பதை உறுதிப்படித்திகிறது...
ஐநா நடவடிக்கை எடுக்கப்படும்...

என்கிற தகவல் எல்லா இணையத்திலும் பத்திரிகைகளிலும் செய்திகளை ஆக்கிரமித்து கிடக்கிறது...

'இலங்கைக்கு ஐநா பாதுகாப்பு வழங்கப்படாவிடின் சீனா, ரஷ்யாவை நாட நிற்பந்தம் ஏற்படும்' என்ற பாதுகாப்புச் செயலாளரின் அறிக்கை 'மக்களுக்காக நான் மின்சாரக் கதிரையைக்கூட ஏற்பேன்' என்று அறிக்கையாக நீளுகிறது இந்த நாடகம்.

தெற்கை ஆக்கிரமித்துள்ள இந்த செய்திகள் உண்மையில் வடக்கிலோ, கிழக்கிலோ பெரிய அளவில் பேசப்படவில்லை என்பதே உண்மை. போர்க்குற்றங்கள் பற்றி அறிய ஐநா அறிக்கை ஒன்றும் இங்கு தேவையில்லை. எது உண்மை என்று எல்லாருக்கும் நன்றாக தெரியும். இவ்வளவு கால யுத்தம் செய்துவிடாத ஒன்றை ஐநா அறிக்கை செய்துவிடப்போவதில்லை என்ற கருத்தே மேலாக ஓங்கி நிற்கிறது. 'எவ்வளவோ பாத்திட்டம் இவங்கள் என்ன புதிசா செய்யப்போறாங்கள்' என்ற நிலையே உள்ளது.

ஐநா அறிக்கை இலங்கை அரசிற்கு எதிராக இருந்தாலும். அதை அடுத்து எந்த நடவடிக்கைகள் எடுக்கப்பட முயற்சி எடுக்கப்பட்டாலும் அதை சீனாவோ, இந்தியாவோ, ரஷ்யாவோ நிச்சயம் தடுக்கும் என்றும் அறிந்த விடயம். இதை எல்லாவற்றையும் மீறி என்ன நிகழ்ந்தாலும் அது காலம் கடந்ததாகவே கருதப்படும்.

வன்னியில் இருதரப்பு யுத்தத்திலும் இறந்திவிட்ட எத்தனையோ அப்பாவிப் பொதுமக்கள் மீண்டு வரப்போவதில்ல. எண்ணெய் வளம் இருப்பதால் லிபியா மீது இருந்த கரிசனம் அன்று தமிழன் மீது இருக்கவில்லை.
தமிழர்கள் தங்களை ஒரு சிறுபான்மை இனமாக ஏற்றுக்கொண்டு தங்கள் வாழ்க்கை முறையை அதற்கு ஏற்றாற்போல் மாற்றிக்கொண்டு வருகிறார்கள். அவர்களை பொறுத்தவரை தீர்வுத்திட்டம் பற்றியோ ஏன் கடைசி மாகாண சபை பற்றியோ எந்தவித அக்கறையும் இல்லை. அண்மையில் நடந்த உள்ளூராட்சி சபை தேர்தல்கள் வாக்களிப்பு சதவீதங்கள் இதற்கு சான்று பகிர்கின்றன. அவர்கள் தங்கள் தேசிய வியாதியான 'மறதி'யை பெற்றுவிட்டார்கள். இப்போது வாழ்வதுதான் இயல்பு வாழ்க்கையும் என்ற நிலை வந்துவிட்டது.

நீண்ட தூரம் ஓடி விட்ட களைப்பு ஏற்பட்டுவிட்டதகவே தமிழர்கள் உணர்கிறார்கள். தமிழனை பொறுத்தவரை அவன் இலவு காத்த கிளி. இது வருத்தப்ப்ட கூடிய ஒன்றுதான் ஆனால் இதுதான் நாங்கள் நிதம் வாழ்ந்து கொண்டிருக்கும் நிதர்சனம்...

என் கவிதைகள்...

2011-04-15T01:05:00.000-07:00

என்ன சொன்ன போதிலும் - அதை
                          சொல்ல தகுதியில்லை என்கிறீர்
நீ எப்படிச் அதைச் சொல்வாய் என்றோ
                          ஏளனம் தன்னை பேசுகின்றீர்
முன்னம் செய்ததெல்லாம் - இவன்
                          மறந்துவிட்டான் என்கின்றீர்
பின்னம் செய்யப்போவது இதுவென்று
                          அடித்து உரைக்கின்றீர்
எண்ணம் இவனது சாக்கடை - இவன்
                          எதுக்கும் உதவானென்கின்றீர்
அறிந்ததேனென்றேன் அகம்பாவமென்றீர்
                          அறியவில்லையென்றேன் அறிவிலியென்றீர்
புரிந்தேனனென்றேன் வெறுங்கூச்சலென்றீர்
                          புரியவில்லை என்றால் உட்கூடென்றீர்
நான் சொன்னது என்னைதான்
                        சொல்லுகிறேனென்று புரியவில்லை உமக்கு
சொல்வதை நிறுத்திப் பார்த்தேன் - உம்
                           சொல் 'வதை' முடியவில்லை
நானும் மீண்டும் ஆரம்பித்துவிட்டேன
                           என் வாழ்க்கை எதுவென்றறிந்து.....

-மோனி...

Where's the spirit of Cricket ...??

2011-04-12T21:33:00.000-07:00

The spirit of cricket is almost diminishing in the hearts of cricket lovers from all over the world after the 2011 WC. Although cricket lovers stand their loyalty to the team they support. But that support is mainly dominated by the iconic players from the team.

Retirement of Players

Speaking of retirements... I read a banner by a fan in the Mumbai Indians Vs RCB match last night

"Sachin is my God, Cricket is my world
When sachin retires
I am ready to leave my world
But worship the God"

This is the case we will find soon in Indian cricket. And Sri Lankan, Pakistani, South African cricket are just the same. When Sangakara, Mahela, Dilshan, Samaraweera walks out the team the spirit from the Sri Lankan cricket fans will also walk out. The same will happen with Pakistan when Afridi and Younis steps down.

This has already happen in the past, in West Indies, when the iconic players made their way out. Cricket went down from then onwards they could never recover. Even in Australia when the big guns Langer, Warne, Hayden, Martin and Gilchrist left. The consequences were the same.

The biggest problem is that we don't enjoy watching cricket because playing mostly is built with slog sweeps and heaves. The exquisite cover drives, the backfoot punch, the delicate glance are only seen by players who are about to leave. And the young players will need time to get there. The in between time is going to be a blackout for cricket.

The downfall of Australia

Cricket seems to have lost a lots of interest with the mighty Australia crumbling down. Whatever we may argue but the Australian of 2003 - 2007 was the best we have ever seen. But now they have become so vulnerable. And defeating them doesn't give the satisfaction. I don't mean that Australian will be back strong but i believe that it will take some time.

The sense of miss and sense of over

As far as Sri Lankan, Pakistan, England, RSA are concerned they feel a sense of let down. With Australia out of the equation this time each tean had a fighting chance to the cup but all missed it. I don't know what are playing in the minds of players but definitely fans hav lost the booming cricket spirit. And as far as India is concerned, they got what they needed. They don't want cricket anymore. It's all over with them.

Cricket is about to serve a blackout. To avoid this it should better produce some heroes.

Considering these facts i believe for my generation the feel of cricket will go down. Its the next set of fans will have to take over by watching the young teams perform, enjoy and hero worship them just as we did in our childhood with Sachin, Sanga, Gilly and others....
(These are only my views...)

- Moni..

நானும் 5 star ஹோட்டலுக்கு போயிருந்தேன்....

2011-03-31T19:07:00.000-07:00

கண்ணாடியா? தரையா?
ஏழைவிட்டு கண்ணீர்
கழுவியதா....???
வாய்பிளந்து தலைகுனிந்து
முகம் பார்த்து
பெருமூச்சுவிட்டேன்...
"நல்ல காலம் சாரம் கட்டவில்லை.."
என்று...

அமர்ந்தேன், நண்பன் அருகில்
"Good morning sir.."
அண்ணாந்து பார்த்தேன்
சற்றும்ஒட்டாத புன்னகை
அவன் முகத்தில் ஒட்டியிருந்தான்
மட்டை கொடுத்தான்
மடிக்காமல் வாங்கி வாசித்தேன்

சோளக்கூழில் மிளகாய் தேடுபவன்
நகரத்திற்கு வந்து அண்ணாந்ததை போல
புரட்டிப் பார்த்தேன், தலைகீழாய் பார்த்தேன்
புலப்படவில்லை, புரியாமலே
கோழி பெயர் போட்டதை
கோடிட்டு காட்டினேன்

வரும் வரைக்கும் அங்கும் இங்கும்
வாய் பார்த்தேன்
எல்லாரும் மென்று முழுங்கிறார்கள்
எவனும் இரசிக்கவில்லை
"புசிக்க இரசிக்க மறந்த மனிதன்
மரித்தே வாழ்கிறான்.."
இவர்களுக்கு
இரங்கல் அறிக்கை
இரைந்து கொண்டிரருக்க

பளிச்சிடும் பாத்திரத்தில்
பரிமாறினான்
இரும்பு இரண்டு கொடுத்தான்
இருகை நீட்டி வாங்கினேன்
கைபிசைந்து சாப்பாட்டை
கைமா பண்ணணி சாப்பிடுவதில்
உள்ள சுகம் இவ் வையத்தில்
உளதோ... ?? என்றெண்ணி
கொடுத்த இரும்பை கடாசிவிட்ட
கொண்டு வந்த சாப்பாட்டில் கை வைத்தேன்
அருகில் இருநத்தவன்
அவன் கிட்னியை யாரோ
திருடியது போல என்னை
தின்று பார்த்தான்

சாப்பாட்டை
கடித்தேன் கரைந்து
உறிஞ்சினேன் உருகியது
உப்பில்லை உறைப்பில்லை
ஒடியற் கூழ் குடித்தால்
ஓடி வருமாம் ஆனந்த கண்ணீர்
எனக்கும் வந்த்து கண்ணீர்
என் நிலை எண்ணி வந்த துக்க கண்ணீர்

மென்று தின்று
முக்கி முனகி
சாப்பிட்டு முடித்து
சற்றே வெளியே வந்து

எனக்குள்
சிலாகித்தேன்
"அம்மா உன் கருவாட்டு
குழம்பும் புட்டும்
ஒரு கோடி தேறும்...."

-மோனி...

காதல் கடிதம்...

2011-03-06T17:41:00.000-08:00

அன்புள்ள காதலிக்கு,

கண்ணீரால் இதை எழுதவில்லை
உதிரத்தால் நிறத் தீட்டவில்லை
உணர்வுகள் கொண்டு நிரப்பவில்லை
வலியால் துவண்டு கரையவில்லை

இது வெறும் கடிதம்
இதில் என்ன தெரியப் போகிறது

வார்த்தைகளில் தெரிவதில்லை அம்மா
உள்ளங்களின் ஆழம்
மெளனத்தில் கூட புரிந்துவிடுமடி
உண்மைக் காதல்

உன்னை மறந்து போகவுமில்லை
அல்ல - நினைத்தே
உருகிப் போகவும் மாட்டேன்

நிழலாய் மாறுமுன்
நினைவுகளின் - வாசலினின்று
அழுது உருகுகிறேனென்று
பொய் சொல்லவுமில்லை

இது வெறும் கடிதம்
இதில் என்ன தெரியப் போகிறது

கடிதங்கள்
துாரங்களின் அடையாளங்கள்
நேசங்களின் அலங்காரங்கள்
"என்றும் என்னோடு இருக்கும்
உனக்கு எது இதற்கு?" என்று
கவிதையில் பொய்யும்
சொல்லப் போவதில்லை

சுற்றும் முற்றும் பார்க்கிறேன்
உன்னைத்தான் காணவில்லையே

நீ என்னுள் தந்த காயங்களை
இரசிக்கிறேன்
நிரப்பி வழித்த சோகங்களை
நேசிக்கிறேன் - என்று
வைரமுத்துவாய் காசிற்கு
புழுகவும் மாட்டேன்

நீ இல்லையென்றால் செத்துவிடுவேனென்று
முட்டாளாய்
உன் நினைவுகளில் வாடி மடியும்
பித்தனாய்
நிச்சயமாய் வாழமாட்டேன்

திரும்பும் இடமெல்லாம்
உன் நினைவுதான் என்று
பிதற்றவும் மாட்டேன்

உன்னை இழந்த சோகத்தில்
தாடியும் கையில் சாடியுமாய்
உன் மேல் சத்தியமாய் போகமாட்டேன்

சாதிக்க இலட்சியங்கள்
நூறு உண்டு எனக்கு

இது வெறும் கடிதம்
இதில் என்ன தெரியப் போகிறது

என்னதான் சொல்லவருகிறான்
இவன் என்கிறாயா..??
நீ நெஞ்சில் பூத்துவிட்டாய்
இனி அது உதிராது

நான் கடந்து போகிறேன்
உ்ன் மேல் கொண்ட காதலுடன்

என்னோடு வருவதும்
இல்லை போவதும்
உன்னோடுதான்

அன்புடன்.
காதலன்

இது வெறும் கடிதம்
இதில் என்ன தெரியப் போகிறது

-மோனி...

திறந்தே வை....

2011-03-05T21:21:00.000-08:00

வழிதவறி - உன் வீட்டு
வழிஅறிந்தே
வாசல் வந்தேன்...

குணம் கெட - உள்ளும்
மனமும் கெட்டு
உன் அணையை
தேடிவந்தேன்...

கேட்ட அடையாளம் சரி
பெயர் மாற்றிவிட்டாய் போல
உனக்கும் அதன் தேவைதான் என்ன...??
எனக்கும் அதன் தேவைதான் என்ன..??

கொடுக்க விலை - தெரியாது..
காசில்லாவிட்டால்...
கடவுளிற்கும் கதவுசாத்துவாய்
நீ..

அத்தோடும் சேரத்து
பையில் இரண்டும் உண்டு

கதவைத் திறந்தே வை...

- மோனி..

The Motorcycle Diaries - வாழ்க்கைப் பயணங்கள்

2011-02-25T09:09:00.000-08:00

'சே குவேரா'... பெயரை சொல்லும் போதே அதிரும் மறைந்த சரித்திரம். நினைவுகளில் வாழ்ந்து வரும், புரட்சி மற்றும் மக்கள் சக்தியின் அடையாளம். தன் வாழ்க்கையை மக்களுக்காக இழந்த உண்மையான கதாநாயகன். இதுவரை எழுந்து வீழந்த புரட்சிகளும் இனி எதிர்காலத்தில் வரவிருக்கும் புரட்சிகளுக்கும் ஒரு விடிவௌ்ளியாக இருக்கிறார். அவரது வாழக்கை சுவடுகள் பல புரட்சியாளர்களுக்கு வழிகாட்டியாக இருந்து வருகிறது.

அஸ்தமாவால் பாதிக்கப்பட்ட ஒரு மருத்துவக் கல்லூரி மாணவனாக இருந்தும் தன் சுயநலத்திற்காக வாழ்ககையை வாழாமல் ஏகாதிபத்தியத்தை அதுவும் அமெரிக்கா ஏகாதிபத்தியத்தை எதிர்த்து தன் நாடு, உறவு, காதல் என்பவற்றைத் துறந்து கியூபா, கொங்கோ, பொலிவியா என்று பன்முக சமூக அமைப்பின் மக்களின் விலங்குகளை அவிழ்ததெறிய பாடுபட்ட ஒரு மாமனிதர். வருத்தமும், துரோகமும் பின்தொடர்நது வந்தாலும் தன் இலக்குகளிலிருந்து வழுவாமல் இருந்தார். ஆடம்பரத்தை வெறுத்தார். கியூபாவில் தனக்கு கொடுக்கப்ட்ட அமைச்சர் பதவியை துச்சமாக மதித்து தொழிலாளர்களுடன் தொழிலாளர்களாக நின்று மூட்டை தூக்கினார், வண்டில் இழுத்தார். தான் கொண்ட பொதுவுடைமை வாதத்திற்கு எடுத்துக்காட்டாக நின்றார். கொங்கோவில் சர்வாதிகார பிடியில் சிக்கிய மக்களின் அவலக்குரல் கேட்கவே தன் பதவியை தூாக்கி எறிந்து கொங்கோவிற்கு விரைந்தார். அவருடைய
"Hast La Vigi Oria Siembre" (ஒன்றில் மரணம் அல்லது வெற்றி) என்று முடியும் பிடல் கஸ்டுரோவுக்கான கடிதம் வரலாற்றின் மறக்கமுடியாத வார்த்தைகளும் தருணங்களும். அப்படிப்பட்ட சே குவேராவின் வாழ்க்கையில் புரட்சி பற்றிய சிந்தனையை வித்திட்டு ஒரு சாதாரணமானவனிலிருந்து ஆசீர்வதிக்கப்ப்ட்டவராக மாற்றியது மோட்டார் சைக்கிளில் அவர் சென்ற தென் அமெரிக்க பயணங்கள்.

அவருடைய The Motorcycle Diariesஜ வாசித்த எவனும் புதிதாய்ப் பிறப்பான். வாழ்ககையின் புதிய பரிமாணங்கள் அவன் முன் விரியும். அப்படி ஒரு உணர்வு வெளிப்பாடும் பொதுப்படையான நோக்கும் அந்த நூலில் இருக்கும். வாழ்ககையை வாழத்துடிக்கும் இரு இளைஞர்களின் வாழ்வோடான புரிதல்களின் சாராம்சமே இந்த பயணங்கள். இதை சே தனது குறிப்புக்களில் இவ்வாறு கூறுகிறார்.
"What we had in common - our restlessness, our impassioned spirits, and a love for the open road."

அப்படிப்பட்ட வரலாற்றுச் சிறப்புமிக்க ஒரு தொடரினை மையப்படுத்தி 2004ஆம் ஆண்டு வெளிவந்ததே இந்த திரைப்படம்.

அவரது மோட்டார் சைக்கிள் டயரியின் தமிழ் மொழிபெயர்ப்பை நான் வாசித்தேன். அதன் பின்னரே இந்தப் படத்தை பாரக்கும் வாய்ப்பு எனக்கு கிடைத்தது. அந்தப்புத்தகத்தில் சே இயற்கையின் வர்ணணைகளோடு உணர்வுகளிற்கும் வர்ணம் தீட்டி தன் எண்ணங்களை அழகாக பிரதிபலித்திருப்பார்.

இந்தப் படத்தை பார்ககச் செல்லும் போது என் எதிர்பார்ப்பை நிச்சயம் திருப்தி செய்யாது என்றே எண்ணிச் சென்றேன். அதற்கு முக்கிய காரணம் இதன் இயக்குனர் Walter Salles பெரிதும் பிரபலமில்லாதவர். அத்தோடு படம் முழுதும் அர்ஜென்டிய மொழியிலேயே எடுக்ப்பட்டிருக்கும். உபதலைப்புக்களையே நம்பி இருக்க வேண்டி இருக்கும்.

ஆனால் படத்தை பார்த்து அதிர்ந்துபோனேன் என்பதே உண்மை. அதை அணுஅணுவாக ரசித்தேன். சேயாக வரும் Gael Garcia Bernal மற்றும் அல்பெடர்டோவாக வரும் Rodrigo De La Seran அற்புதமாக நடித்திருந்தார்கள். ஒரு ஆவணப்படத்தை எதிர்பார்த்துச சென்றேன் ஒரு உயிர்ப்புள்ள படத்தை பார்த்து கண்ணீருடன் வெளியேறினேன்.

இந்தப்படத்தை பற்றி விமர்சிப்பதற்கு எதுவுமில்லை. உணர்வுபூர்வமான ஔிப்பதிவே இந்தப்படத்திற்கு மிகப்பெரிய சக்தி. ஆனால் நெஞ்சில் நீங்காத சில கட்டங்களை பகிர்ந்துகொள்ள விரும்புகிறேன். இருவரும் ஒரு வயதானர் ஒருவரின் வீட்டில் தங்க அனுமதி கேட்பார்கள். அப்போது அந்தக்கிழவன் நீங்கள் என்ன செய்கிறீர்கள் என்று கேட்க சே தான் ஒரு மருத்துவன் என்றும் அல்பெர்டோ தான் ஒரு இரசாயாணவியல் ஆராய்ச்சியாளர் என்று அறிமுகப்பப்படுத்த. கிழவன் தன் கழுத்தில் உள்ள கட்டியைக்காட்டி இது என்னவென்று கேட்க அல்பெர்டோ அந்தக் கிழவனை சமாதானப்படுத்தி வீட்டில் இடம் பெறும் பொருட்டு சாதாரண கட்டி என்று பொய் சொல்ல சே இல்லை அது புற்றுநோய்க் கட்டி என்று முகத்திற்கு நேரே சொல்வது அற்புதம்.

பின் வயதுபோன மூதாட்டிக்கு சே வைத்தியம் பார்க்கும் காட்சி ஒரு மென் கறுப்பு பின்னணியில் திரையாக்கப்பட்டிருக்கும். அதில் Gael பிரதிபலிக்கும் உணர்வுகளும் பின்னணியில் ஒலிக்கும் குரல் சொல்லும் சொற்களும் உண்மையில் கண்ணீரைத் தரும்.

சிலி எல்லையைக்கடக்கும் போது சே சந்திக்கும் இரு ஏழைக் கணவன் மனைவியரின் கதையும் அவர்கள் மேல் கொண்ட பரிதாபத்தால் தன்னிடம் அவருடைய காதலி தந்த இறுதிப்பணத்தைக் கூட தானம் செய்துவிட்டு வரும் காட்சிகள் அழகு. இவ்வாறு தொடரும் காட்சிகளில் உச்சக்கட்டம் தொழுநோய் மருத்துவமனையில் சேயின் காலகட்டங்கள்.

அந்த காட்சிகளில் பிரிதிபலிக்கப்படும் உணர்வுகள் வார்த்தைகளில் விவரிக்கமுடியாதவை. அதற்கு நீங்கள் கட்டாயம் இந்தப் படத்தை பாரகத்தான் வேண்டும். தயவுசெய்து பாருங்கள். அதிலும் தொழு நோய் மருத்துவமனையில் சேயின் இறுதி வார்த்ததைகளை தத்தரூபமாக நடித்து காட்டியிருப்பார்.

இறுதியாக படம் முடிந்த பின்னர் உண்மையாக சேவுடன் பயணம் செய்த அல்பெர்டோ வயதான தோற்றத்துடன் திரையில் தெரிவார். சேகுவேராவை பின் தொடரும் பலருக்கும் அந்த காட்சி நிச்சயம் நெஞ்சு உருகும்.

இந்தக் கட்டுரையில் சில முக்கியமான கட்டங்களை தவிர்த்தே எழுதியுள்ளேன். இது உங்களை இந்தப் படத்தை பாரக்க நிச்சயம் தூண்டும்.

மெல்லிய பின்னணி இசையுடன் பல வர்ண மக்களை கறுப்பு வௌ்ளை புகைப்படமாக காட்டி படம் முடியும். இந்தப் படத்தை பற்றி கூறுவதென்றால் சேகுவேரா தன் டயரிகளில் எழுதிய வார்த்தைகளையே கூறவேண்டும்.
"Wandering around our America has changed me more than I thought. I am not me any more. At least I'm not the same me I was. "

இந்தப்பயணங்கள் வாழ்கையின் பயணங்கள்....

சுஜாதாவின் 'கொலையுதிர் காலம்' மற்றும் The Hound of Baskevilles ஒரு ஒப்புநோக்கு..

2011-02-22T08:10:00.000-08:00

என்ன இப்படி ஒரு விசித்திரமான தலைப்பு என்று உங்கள் சிந்தனை ஓட்டம் எனக்கு புரிகிறது. 1901 எழுதப்பட்ட ஒரு ஆங்கில நாவலையும் 1981 ஆம் ஆண்டு எழுதப்பட்ட ஒரு தமிழ் நாவலையும் ஏன் மீண்டும் தோண்டி எடுத்து அதுவும் ஒப்பிட்டு ஆராய வேண்டும். எனக்கு வேறு வேலை எதுவும் இல்லையா என்பது போல இருக்கு உங்கள் பார்வை.

சுஜாதா அவர்களின் தீவிர இரசிகன் நான். அவரின் பன்முகத்தன்மையை நான் மிகவும் வியந்திருக்கிறேன். அவருடைய இழப்பு தமிழ் இலக்கிய மற்றும் விஞ்ஞான துறைக்கு மிகவும் ஈடுகட்ட முடியாத ஒன்றாகும். அவருடைய கொலையுதிர் காலத்தை வாசித்துக் கொண்டு இருக்கும் போது அது Aurthur Cannon Doyleஆல் எழுதப்பட்ட கதைக்கு கருவிலும் அமைப்பிலும் பெரும் பங்கு தழுவி இருந்தது என்பது என்னை மிகவும் உறுத்தியது. அதனால் பல வருடங்களிற்கு முன்னர் வாசித்த ஆங்கில நாவலை மீண்டும் வாசித்து இந்த ஒப்புநோக்கை எழுதியுள்ளேன்.

Sherlock Holmes, Dr. Watson என்ற கதாபாத்திரங்கள் ஆங்கில நாவல் வாசகர்கள் மத்தியில் மிகவும் பிரபலமானவர்கள். இருவரும் சேர்ந்து கொலைகள் கொள்ளைகள் பற்றிய துப்பறியும் கதைகள் மிகவும் ஈர்ப்பனவாகவும் துடிப்புடையதாகவும் இருக்கும். Aurthur Cannon Doyle என்ற நாவலாசிரியரால் உருவாக்கப்பட்ட இந்த கதாபாத்திரங்களுக்கு மக்கள் மத்தியில் மிகப்பெரிய வரவேற்பு காணப்பட்டது. அந்த வரவேற்பிற்கு கட்டியம் கூற ஒரு சிறு சம்பவத்தை கூறலாம். ஒரு கதையில் Sherlock Holmesஜ கொன்றுவிட்டு இதோடு அந்த கதாப்பாத்திரத்தில் கதை எழுதுவதில்லை என்று ஆசிரியர் கூற. மக்கள் அதை எதிர்த்து ஆர்ப்பாட்டம் நடத்தி Sherlock Holmes மீண்டும் உயிர்பிக்கப்பட்டார்.

இப்படிப்பட்ட கதாபாத்திரங்களை அடிப்படையாகக் கொண்டு பல சிறுகதைகளையும் ஒரு சில நாவல்களையும் அவர் எழுதயுள்ளார். இந்த நாவல்களை தொட்ட எவரும் அதை தண்ணி ஆகாரம் மறந்து படிப்பார்கள். அந்த வகையில் வந்த நாவல்தான் The Hound of Baskervilles.

The Hound of Baskervilles - (கதைச்சுருக்கம்)

Baskervilles என்வர்கள் காலம் காலமாக பெரும் சொத்து படைத்த குடும்பம். அவர்களுடைய வீடு ஒரு கிராமத்தில் அமைந்துள்ளது. Charles Baskerville என்ற அந்த குடும்பத்தைச் சேர்ந்தவர் மர்மமான முறையில் இறந்து போகிறார். அவரை Baskerville குடும்பத்தினை தொடரும் ஒரு பேய்தான் கொன்றது என்று நம்பப்படுகறது. அந்தப் பேய் பல தசாப்தங்களுக்கு முன்னால் Baskerville குடும்பத்தைச் சேர்ந்த ஒருவரால் வல்லுறவுககுட்பட்ட பெண்ணால் ஏவப்பட்டது என்றும் கூறப்படுகிறது. இதனால் இறுதியாக அந்த பெரும் சொத்துக்கு வாரிசு இறந்தவருடைய மருமகன் Henry Baskervilleதான். ஆனால் அவரை ஒரு ஆபத்து சூழ்கிறது. அதே பேய் அவரையும் கொல்ல துடிக்கிறது. இதை ஆராய்ந்து அவரை காப்பாற்ற Sherlock Holmes வருகிறார். இறுதியாக அப்படி ஒரு பேயும் இல்லை ஆனால் எப்போதோ தொலைந்துபோன ஒரு தெரியாத வாரிசுதான் இதை செய்கிறது என்பதை கண்டுபிடித்து Henryயை காப்பாற்றுகிறார் என்று முடிகிறது கதை

கொலையுதிர் காலத்திற்கு ஒரு சுருக்கம் சொல்ல நான் விரும்பவில்லை ஏனென்றால் அதை வாசித்தவர்களுக்குதான் என் கட்டுரையின் தலைப்பு ஓர் ஈர்ப்பைக் கொடுத்திருக்கும்.

அதனால் நேரடியாக ஒற்றுமைகளுக்கு போகிறேன். அங்கே Baskervilles என்பது போல இங்கே வியாசர்கள். அங்கே எவ்வாறு ஒரு மனிதனை விட பெரிய நாய் கொல்வது போல இதில் ஹோலோகிராப். அங்கே எவ்வாறு தெரியாத வாரிசு போல இங்கேயும் தெரியாத யாரோ வாரிசு என்று பல அடிப்படைகளில் ஒற்றுமை என்னை திகை்கக்க வைத்தது.

இது சுஜாதாவின் தனித்தன்மையை கேள்விக்குள்ளாக்கியது.. இதை நீங்களும் ஆங்கில நாவலின் கதைச்சுருக்கத்தை சொல்லும் போது உணர்ந்திருப்பீர்கள். ஆனாலும் என்னபை் பொறுத்தவரை சுஜாதாவின் கதை சொல்லும் பாணியும் கதாப்பாத்திர அமைப்பும் The Hound of Baskervilles உடன் ஒப்பிடும் போது மிகவும் சிறப்பாக காணப்பட்டது. Sherlock Holmes என்ற கதாப்பாத்திரத்திற்கு எல்லாம் தெரியும் என்ற மேதாவிலாசத்தன்மை இதில் இல்லாமல் செய்த சுஜாதா, கணேஷ் என்ற முக்கிய கதாபாத்திரத்துடன் வாசகர்களை மிகவும் துடிப்புடன் கொண்டு நகர்த்தியுள்ளார்.

ஒரு திரில்லர் கதை என்ற பரிமாணத்துடன் நின்றுவிடாது அதனுள் விஞ்ஞானத்தையும் புகுத்தி முடிவில் அமானுஷ்யமா விஞ்ஞானமா என்ற முடிவை வாசகர்களுக்கு விட்டது அழகு.

சுஜாதாவின் தனித்தன்மைகுள் எனக்கு எழுந்த கேள்விகளுக்கு நானே கண்ட விடையை உங்களிடம் பகிர்திருக்கிறேன். ஒருவழியா நானே குழம்பி நானே தெளிஞ்சிட்டன். என்னைப்போல குழம்பியிருக்கும் சிலருக்கும் இது ஒரு தெளிவைத் தந்திருக்கும் என்று நம்புறன்.

கருவில் ஒற்றுமை பல காணப்பட்டாலும் கதை சொல்லும் நுட்பத்திலும் போக்கிலும் சுஜாதாவின் ஒரிஜினாலிட்டி அவரை அவராக வைக்கிறது என்பதே என் முடிவு.

-மோனி...

கவிதை...??..

2011-02-22T01:21:00.001-08:00

மின்னல்களைப் பிடித்து
கூண்டுக்குள் இட்டுவிட்டேன்
மின்மினி ஔிகண்டு
இருளிற்கு ஓடுகிறேன்...

வானத்தை எடுத்து
கைக்குட்டை செய்துவிட்டேன்
வழிந்தோடும் வியர்வையில்
மூழ்கித் தத்தளிக்கிறேன்

வானவில்லின் மேலேறேி
வர்ணங்கள் மாற்றிவிட்டேன்
அகரம் விளங்காமல்
தகரமாய் தவிக்கிறேன்

சமுத்திரத்தைப்பிடித்து
செம்பிற்குள் அடைத்துவிட்டேன்
சதுரங்க கட்டைகளிற்குள்
மாண்டு விழிக்கிறேன்

கடவுளைக் கண்டு
விட்டேன்
கவிதை...???

- மோனி

போகும் வழியில்..

2011-02-22T01:18:00.000-08:00

சிரித்தான்..
நானும் பதிலுக்கு..
எங்கேயோ கண்ட முகம்
"என்னை ஞாபகம் இருக்கா..??"
என்ற அவனது கேள்வி
"உங்களை ஞாபகமில்லாமலா"
என்ற எனது பதிலோடு
ஏதேதோ கேள்விகேட்டோம்..
என்னென்னவோ விடை சொன்னோம்..
வாழ்க்கை அழைத்துவிட
பிரிந்து போகும் போது
முய்ற்சித்தேன்
அவனது பெயரை ஞாபகப்படுத்த...

-மோனி..

Forrest Gump - உணர்வுகளின் கலவை

2011-02-18T08:53:00.000-08:00

உயிர்ப்போட்டமான சினிமாக்களை இரசிப்பதென்பது தமிழ் இரசிகர்களுக்கு எருமை மாட்டை தண்ணீரில் வைத்து விலைபேசுவது போன்றாகிவிட்டது. அந்த வகையில் ஒரு உயிர்ப்போட்டமான திரைப்படத்தின் விமர்சனம் என்று இல்லாமல் விம்பத்தை பிரதிபலிக்கும் இந்தக் கட்டுரையில் உங்களை சந்திப்பதில் மகிழ்ச்சி அடைகிறேன்.

உயிர்ப்போட்டமான சினிமாக்கள் பல உண்மையின் விம்பத்தை பிரதிபலிக்கும் போது மிகவும் மெதுவான திரைக்கதையையோ, படத்தின் ஆரம்பத்தில் இருந்து இறுதிவரை ஒரே உணர்வை அதுவும் சோகத்தை சுமந்ததாகவே காணப்படும். வாழ்க்கையின் அழுத்தத்தை தொலைக்க முயற்சிக்கும் பலருக்கு இந்த படங்களை பார்ப்பதென்பது கல்லைத் திண்பது போல. ஆனால் Forrest Gump 1994ம் ஆண்டு வெளிவந்து சிறந்த திரைப்படம், சிறந்த நடிகர், சிறந்த இயக்குனர் உள்ளிட்ட ஆறு ஆஸ்கார் விருதுகளைப் பெற்றது மட்டுமல்லாமல் சினிமா வியாபார குணாதியசங்களை உயிர்ப்பான முறையில் வௌயிட்ட திரைப்படமாகும். ஒரு திரைப்படம் வியாபார ரீதியகவும் விமர்சன ரீதியாகவும் வெற்றி பெறுவதென்பது மிகவும் அபூர்வான நிகழ்வாகும். அந்த அபூர்வத்தில் இந்த திரைப்படமும் ஒன்றாகும். ஆறு ஆஸ்கார்களை மட்டுமல்லாது இதுவரை ஹாலிவூட் சினிமாவில் வெளிவந்த திரைப்படங்களுள் அதிக வசூல் பெற்ற திரைப்படங்களில் 21ஆவது இடத்தை பிடித்துள்ளது.


Robert Zemekics

Tom Hanks

Robert Zemekics இயக்கி Tom Hanks நடித்த இப்படம் 1986ம் ஆண்டு Winston Groom என்ற நாவலாசிரியரால் எழுதப்பட்ட Forrest Gump என்ற நாவலை தழுவி எடுக்கப்பட்டதாகும் ஹாலிவூட் சினிமாவின் சராசரி இரசிகர்களுக்கு Tom Hanks, Robert Zemekics எந்த வகையிலும் புதியவர்கள் இல்லை. Back To The Future என்ற சினிமா வராலாற்றின் முக்கிமான திரைப்படத்தை எழுதி இயக்கிய பெருமை Robert Zemekicsயே சாரும். அதேபோல 1993 வெளிவந்த Philadelpia திரைப்படத்தில் Tom Hanksன் நடிப்பை யாரும் மறக்க மாட்டார்கள். அந்த திரைப்படம் அவரிற்கு சிறந்த நடிகருக்கான ஆஸ்கார் விருதை பெற்றுத் தந்தது என்பது குறிப்பிட வேண்டிய ஒன்றாகும். தமிழ் சினிமாவில் வெளிவந்த நியூ திரைப்படத்தின் கருப்பொருள் Tom Hanks நடித்த Big திரைப்படத்தில் இருந்து கருப்பொருள் எடுக்கப்பட்டதாகும்.

ஒரு பறவையின் இறகு வானத்திலிருந்து மெல்ல மெல்ல விழுந்து ஒரு பூங்காவில் கதிரையில் இருக்கும் ஒரு மனிதன் மீது விழுகிறது. அதை எடுத்து அந்த மனிதன் தன்னுடைய புத்தகத்தில் பத்திரப்படுத்திக்கொள்கிறார். அந்த மனிதர்தான் கதையின் நாயகன் Forrest Gump. IQ மிகக்குறைந்த ஒரு நபர் தனது பள்ளிப்பருவம் முதல் அந்தக்கணம் இளைஞன் ஆகும் வரை சந்திக்கும் அனுபவங்களின் தொகுப்பே இந்த திரைப்படம்.

அட.... இந்த திரைப்படத்தில் என்ன அப்படி இருக்கு இப்படி எல்லாம் பீடிகை போட்டேன் என்று நினைக்கிறீர்கள் போல இருக்கு. அவசரப்படவேண்டாம்... இநத திரைப்படத்தின் தன்மையை மாற்றியது Tom Hanks ன் அசர வைக்கும் நடிப்பும் மிகவும் நுட்பமாக செதுக்கப்பட்ட திரைக்கதையும் ஆகும். "Stupid is what stupid does.." என்ற வசனம் தனது வாழ்க்கையின் பல இடங்களில் உபயோகிக்கும் நாயகன் இந்த வார்த்தைகளிற்கு பல வர்ணங்கள் தீட்டும் அழகும் இந்த படத்தின் குறிப்பிட வேண்டிய சிறப்பம்சம்.

மிகவும் மக்கான Forrest பள்ளிப்பருவத்தில் மிகவும் ஒதுக்கப்பட்ட ஒருவனாக காணப்பட்டான். பள்ளிப் பருவத்தில் இவனுக்கு துணையாக இருப்பது அவனது அம்மாவும், அவன் நண்பி Jennyம் ஆகும். சிறுவயதிலிருந்தே Jenny மீது அவனிற்கு ஒரு இனம் புரியாத உணர்வு வளர்ந்துகொண்டு வந்தது. ஆனால் அவளோ தன் தந்தையாலேயே பாலியல் துஷ்பிரயோகம் செய்யப்பட்டு பாதிக்கப்பட்டிருந்தாள். இதனை புரியும் பக்குவமோ அறிவோ அவனிற்கு இருக்கவில்லை.

ஆனாலும் இருவரது உறவும் கல்லுாரி வரை தொடரந்தது. அங்கே இவனது மின்னல் போல ஓடும் திறமையால் American Football அணியில் விளையாடும் வாய்ப்பை பெறுகிறான். இதனால் ஜோன் கென்னடியை சந்திக்கும் வாய்ப்பை பெறுகிறான். JFK யை சந்திக்கும் வண்ணம் எடுக்கப்பட்ட காட்சிகள் மிகவும் தத்தரூபமாக எடுக்கப்பட்டிருக்கும். இந்த திரைப்படம் கென்னடி சுடப்பட்டு இரண்டு தசாப்தங்களிற்கு பின் எடுக்கப்பட்ட திரைப்படம் என்பது குறிப்பிடத்தக்கது.

கல்லுாரியின் முடிவில் Forrest வியட்நாம் யுத்தத்தில் பங்கேற்க செல்கிறான். அங்கே அவன் வாழ்கையின் இரண்டாவது நண்பனை சந்திக்கிறான். Bubba என்ற கறுப்பின இராணுவ வீரனுடன் நட்பு கொள்கிறான். அடிமைத்தனத்தை பிறப்புரிமையாக கொண்டு வளர்ந்த அவனது நண்பனிற்கு வாழ்க்கை விடுதலை என்பதே இலக்காக காணப்பட்டது. இருவரும் இணைந்து இறால் பிடித்து விற்பனை செய்வது பற்றி திட்டமிடுகிறார்கள். இராணுவத்திலிருந்து கிடைக்கும் பணத்தை வைத்து யுத்தம் முடிந்த பின்னர் அதை செய்வோம் என்று நண்பனிற்கு Forrest சத்தியம் செய்கிறான். ஆனால் வியட்நாம் யுத்தத்தில் ஒரு கொரில்லா தாக்குதலில் அவன் நண்பன் இறந்து போகிறான். Bubbaவின் இறுதி நிமிட காட்சிகள் கண்கலங்கவைக்கும். அதுவும் முக்கியமாக I want to go home... என்ற அவனது வார்த்தைகள் மறக்க முடியாதைவையாகும். அந்த கொரில்லா தாக்குதலில் காயப்பட்டிருந்த தன் படை பொறுப்பதிகாரியை அவன் காப்பாத்துகிறான். இருந்தாலும் அவரின் இரு கால்களையும் அவன் இழக்கிறார்.

யுத்தத்தின் பின்னர் நாட்டிற்கு திரும்பும் Forrest மீண்டும் Jenny ஐ சந்திக்கிறான். ஆனால் இந்த முறை அவள் ஒரு டிஸ்கோ அரங்கில் உடைகளை களைந்து ஆடும் Stripper ஆயிருந்தாள். ஆனால் அவளின் நிலையைப் புரிந்துகொள்ளும் அறிவு அவனிற்கு இருக்கவில்லை. கொஞ்ச காலம் இவனுடன் இருக்கும் அவள் அவனை விட்டு வேறொருத்தனுடன் செல்கிறாள்.

தன் நண்பன் Bubba விற்கு கொடுத்த சத்தியத்தை காப்பாற்ற இறால் பிடிக்கும் தொழிலிற்கு புறப்படுகின்றான். அப்போது அவனால் வியட்நாமில் காப்பாற்றப்பட்ட படைப்பொறுப்பதிபாரியும் இணநை்து பெரு வெற்றி பெறுகிறார்கள். அதனைத் தொடர்ந்து அவன் அம்மாவும் இறக்கிறாள். கவலையைக் கூட புரிந்துகொள்ள முடியாமல் Tom Hanks ன் நடிப்பு அற்புதம்.

பின் வீட்டிலிருந்து எந்தக் காரணமும் இல்லாமல் நாடு கடந்து ஓடுகின்றான். அதன் மூலம் பிரபல்யமைடைகிறான். இதைக் கண்ட அவன் காதலி என்ன செய்கிறாள் என்ன என்பதே படத்தின் கிளைமாக்ஸ். என்ன இவ்வளத்தையும் சொல்லிட்டு கிளைமாக்ஸை சொல்வில்லை என்று யோசிக்கிறீங்களா..??

கிளைமாக்ஸ் பார்த்துக் கொண்டிருக்கும் போது என் கண்களில் கண்ணீர் கண்டேன். நீங்களும் அதை உணரவேண்டும் என்றால் நீங்கள் இந்தப் படத்தை நீங்கள் பாரக்கவேண்டும். முதல் வேலையாக இந்தப்படத்தை எடுத்து பாருங்கள்....

கண்ணீர், கவிதை, சரித்திரம், சிரிப்பு, சிந்தனை என்று பல வர்ணங்களை சுமந்து வந்த இந்தப்படம் உண்மையில் உலக சினிமா வரலாற்றில் முக்கியமான படமாகும். தமிழ் இரசிகர்கள் சரியான மசாலா படம் பார்க்க வேண்டும் என்றால் இதைப் பாருங்கள்......

-மோனி....(மோகனரங்கன்)